جزء كبير من اللي بيخلينا نحس بجو مميز في شهر رمضان المبارك، هو إقامة الشعائر الدينية في المساجد، زيّ صلاة التراويح والاعتكاف، ولمة الناس على موائد الرحمن اللي بيتجمع حواليها مختلف الناس في جو من المودة والرحمة.. ولكن للأسف ونظرًا للظروف اللي بيمر بيها العالم كله بسبب تداعيات فيروس كورونا، كل الحاجات دي اتوقفت في رمضان اللي فات منعًا لانتشار الفيروس، أما بالنسبة لرمضان اللي جاي اللي خلاص على الأبواب، فالإجراءات هتختلف شوية.
صرح وكيل وزارة الأوقاف لشؤون المساجد الدكتور نوح العيسوي، إن صلاة التراويح هتقام في المساجد اللي بتقام فيها صلاة الجمعة وتكون مساحته أكبر من 100 متر بحلول شهر رمضان، وده هيتم مع مراعاة الإجراءات الاحترازية، زيّ إن المصلين يروحوا المساجد بمصلياتهم وكماماتهم الخاصة وهما على وضوء، لإن دورات المياه والأضرحة هتفضل مقفولة ومنع كمان الصلاة في الشارع خارج المسجد لمنع التكدسات. أما بالنسبة لموائد الرحمن ودور المناسبات هتفضل مقفولة علشان الحفاظ على الإجراءات الاحترازية.. ولكن لسه مفيش قرار اتاخد بالنسبة لصلاة التهجد في المساجد لحد دلوقتي.
طبعًا هتم صلاة التراويح وسط عمليات مستمرة من التعقيم والنظافة المستمرة للمساجد اللي هيتم فيها الصلاة، وكمان أكد وكيل وارة الأوقاف إنه مفيش أي حرج من تأدية صلاة التراويح من المنازل بل بالعكس، من المستحب عمل ده خلال الأوقات الصعبة علشان نساعد من تقليل الزحمة والتكدس في المساجد.