أول يوم مدرسة مش بس بداية جديدة للأطفال وسنة جديدة وهم ما يتلم ومصاريف مدارس وكتب وكشاكيل ودروس رايحة جاية.
ده كمان موسم لمهرجان الأمهات، بيظهر فيه أنواع مختلفة من الماميز، وكل أم ليها شخصيتها وطريقتها في التعامل مع أول يوم للمدرسة.
وأكيد في مرحلة من مراحلك التعليمية عشت مع شخصية منهم أو أخذتهم شروة على بعضهم.، تفتكروا إيه شخصيات الماميز اللي هنتكلم عنها أول يوم مدرسة؟
لا تفوّت قراءة: لون العام 2026: كيف تنسق Transformative Teal في ملابسك وديكور منزلك؟
الأم الدراما كوين (أمينة رزق ستايل)
دي بقى بتعيش الدور على الآخر.. العيال لسه دخلوا المدرسة وهي قلبتها فيلم أبيض وأسود. دموع ونهنهة وكأنها هتشوفهم بعد 20 سنة مش بعد 6 ساعات.
مش قادرة تسيبهم من على باب المدرسة وناقص تدخل معاهم الفصل جوا، اللي يشوف الأمهات دي مايشفهومش وهما بيجروا ورا أولادهم بسلاح ثلاثي الأبعاد “الشبشب” علشان يبناموا بدري.
لا تفوّت قراءة: جدل على تيك توك: هل شرب الماتشا يسبب تساقط الشعر فعلا؟
الأم المهمومة بالطلبات و”جروب الماميز”
دي الأم الجد أوي من أول لحظة في اليوم الدراسي، اللي أول ما تدخل المدرسة تفتح دفتر وقلم وتسأل: “فين لستة السبلايرز؟ هو في جروب واتساب للماميز؟”..
مين جاب إيه؟ إيه الواجب؟ مين المدرس الجديد؟، وتحس إن المدرسة بالنسبة لها مشروع Startup، أهم حاجة عندها تظبط الأدوات قبل أي حاجة تانية.
لا تفوّت قراءة: القاهرة تُرمم فندقي شيبرد والكونتننتال.. حين يلتقي عبق الماضي بروعة الحاضر
الأم الواعظة والحكيمة.. شلال نصائح أول يوم مدرسة
دي الأم اللي بتوقفهم في طابور البيت قبل طابور المدرسة كأنها مرشدة اجتماعية، توزع نصايح أول يوم دراسة علشان الكل يبدأ السنة الجديدة على مياه بيضا ومايتكررش حوادث السنين اللي فاتت.
“لازم تذاكري أول بأول.. يا حبيبي خليك شاطر واسمع الكلام” “أسمع كلام الأستاذ وماتتخانقش مع حد في الفسحة وخلي بالك من أخوك”.. لدرجة إن ممكن تدي محاضرة للأهالي مش للعيال بس.
لا تفوّت قراءة: أيقونات الجمال المصري.. 6 نجمات في قائمة أجمل 100 وجه عالميًا لعام 2025
الأم اللي أهم حاجة عندها ” اللانش بوكس”
دي الأم اللي كل تركيزها: “الولد أكل إيه؟ ” .. ممكن تنسى تكتب اسمه على الكشكول بس مستحيل تنسى الجزر في اللانش بوكس.
بتحضر له في الانش بوكس وجبات ممكن ياخدها موظف قرب يطلع معاش، بس طبعًا أهم حاجة التغذية علشان يقدر يواصل حصصه ومساره التعليمي كله.
لا تفوّت قراءة: نجيب ساويرس: 70% من سعر الوحدة فوائد.. وهذا هو الحل الحقيقي للأزمة الاقتصادية في مصر
الأم المتأخرة.. بتنسى المدرسة والطابور أصلًا!
وده نموذج للأمهات في أول يوم مدرسة بنشوفه كتير أوي، اللي بتصحى متأخر وتدخل المدرسة وهي لسه لابسة شبشب البيت.
والأسوأ إنها ممكن تفتكر معاد المدرسة وهي قاعدة بتشرب قهوة. وتدخل المدرسة في آخر الطابور كأنها داخلة سباق ماراثون.
لا تفوّت قراءة: أفضل أماكن الروف كافيه والمطاعم في القاهرة بإطلالات ساحرة لا تُنسى
الأم المحاربة.. معارك مصيرية على أول صف
دي بتدخل معركة أول يوم علشان ابنها ما قعدش في أول صف. تقعد تجادل الناظرة وتطالب بالعدالة التعليمية وكأن الكرسي الأمامي هيدخل ابنه جامعة أوكسفورد.
بالأمر المحاربة دي هي اللي بتبقى مقررة أن المدرسة تبقى ساحة حرب تشهد من أول يوم معارك مصيرية كتير وتقضيها جدال مع المدرسين.
لا تفوّت قراءة: أين تمارس اليوجا في القاهرة؟ دليل لأرقى أماكن التمرين الذهني والجسدي
الأم اللي حياتها بتبدأ بعد ما يروحوا المدرسة “سلام للباشا وهو ماشي”
دي بقى بتحس إن المدرسة فرصة تنضف البيت وتاخد نفس، أول ما العيال يخرجوا من الباب تسيبهم وتكسر وراهم قلة من الفرح والسعادة، وناقص تشغل أغاني وتحيات “سلام للباشا وهو ماشي”.
تبقى مستنية اليوم ده من الصيف كله، وتقول في سرّها: “الحمد لله رجع الهدوء.. وأخيرًا هشرب قهوتي من غير زعيق وخناقات على الريموت!”. المدرسة بالنسبة لها مش موسم دراسة، دي موسم راحة نفسية.