كل بيت عربي أصيل فيه مجموعة شخصيات مكررة من الرجالة، كأنهم خارجين من فيلم قديم، وكل راجل فيهم له طابع خاص، وأسلوب حياة مايتلخبطش مع غيره، بيتقمصه في البيت وخاصة يوم الإجازة وعلى وجه الخصوص يوم الجمعة!
تعالوا نعمل جولة خفيفة كده في عالم الرجالة جوه البيوت ونشوف طلع إيه معانا!
لا تفوّت قراءة: كيف تفهم لغة جيل الـ Gen Z؟ دليلك الذكي والمبسط للمصطلحات العامية
الفرفوش
ده اللي داخل البيت دايمًا بمود فرفشة وبيقضي الإجازة كلها مشغل أغاني وماشي يوزع نكت على البيت.
وعلشان نوصف الشخصية دي افتكرنا شخصية محمود عبد العزيز في فيلم الشقة من حق الزوجة، وعلشان تفتكر المشهد من هنا أو ابنه كريم لما قرر يعيد إحياء المشهد من تاني… دي نقدر نقول عليها من نوادر الرجالة!
اللي بيقضيها طبخ .. الشيف الشربيني!
شخصية من شخصيات الرجالة اللي بتبقى سلاح ذو حدين، بيصحى الصبح تلاقيه المطبخ ومارجعش! فجأة تلاقيه بيجرب وصفات غريبة.
بيحب يقدم الأكل كأنه في برنامج طبخ، وعلى قد ما هو طباخ ماهر، على قد ما بيحتاج جيش ينضف وراه.
لا تفوّت قراءة: أشهر خناقات موسم الصيف.. 7 مشاكل أزلية بتتكرر كل سنة!
سمكري العيلة .. باب النجار مخلع!
ده اللي معاه الشنطة بتاعة المفك والمفصلات مش بتفارقه يوم الإجازة، بيعمل معاينة على البيت ويشوف إيه اللي محتاج تصليح.
لو أي حاجة وقعت في البيت، من أول زرار النور لحد الحنفية والتلاجة اللي مش بتسقع، بيقولك “هخلصها في نص ساعة”، ويقعد 3 أيام.
المشكلة الأكبر بقى أن هو لا بيفهم في سباكة ولا نجارة وبعد يوم من العذاب والشقاء بيضطر يجيب صنايعي متخصص لأن باب النجار مخلع!
اللي بيقضيها نوم طول قعدة البيت
الساعة 9 الصبح نايم، 3 العصر نايم، 8 بالليل نايم. دخل في غيبوبة زي أهل الكهف ومش عارف هيطلع منها ازاي أو في سنة كام.
ده بيكون غالباً كافي خيره شره، عايز يريح في أيام الإجازة بمنتهى السلام.
اللي بيقعد يحكي تاريخ إنجازاته وينظّر عليك
من ضمن شخصيات الرجالة اللي بتظهر في قعدة البيت برضه، اللي كل شوية يجيب سيرة “أنا زمان وأنا عملت وأنا سافرت”، بيحكيلك حكايات عن مواقف بطولية، حتى لو كان رايح يشتري عيش.
بيحكيلك القصة كأنها ملحمة تاريخية. أهم جملة عنده: “أنا فاكر سنة ٩٧ لما…”. ويقولك أنا لما كنت قدك تعبت وشقيت ويطلعك في الآخر ماعملتش حاجة في حياتك.
هو بيبقى اليوم كله حفلة عليك وعلى أنت ازاي ماطلعتش الفضاء وماحققتش المعجزات.
لا تفوت قراءة: حفلات نجوم الغناء من أيام الزمن الجميل.. اكتشف أسعار تذاكر حفلتك المفضلة كانت بكام!
اللي بيتخانق مع أي حد في الصالة
ده دايمًا متعصب… القطة عدت؟ “مين سايب الباب مفتوح؟!” أنوار الشقة كلها منورة؟ “أنتوا ماعندكوش مسؤولية”… عنده نظرية مؤامرة دايمًا.
بيفضل ماشي في الصالة يكلم نفسه ويحاول يجر شكل أي حد معدي.