اتولد طه حسين في 15 نوفمبر من سنة 1889 في محافظة المنيا، وهو أديب وناقد مصري، وواحد من أهم وأبرز المفكرين والأدباء العرب، ومن أكتر الناس اللي أثرت في النهضة المصرية وحركة الفكر العربي الحديث، واتلقب بـ “عميد الأدب العربي”، واترشح مرتين لجايزة نوبل، واتوفى يوم 28 أكتوبر من سنة 1973.
فقد طه حسين نظره من وهو عنده 4 سنين علشان الرمد والجهل، وأهله ماقدملهوش مساعدة من طبيب، والحلاق هو اللي وصفله دوا غلط ضيع نظره، ودرس طه حسين في الأزهر، لكنه كان شايف إن المناهج هناك مش متقدمة ولا بتفيد بحاجة، وطرق التعليم مش متطورة، فدخل الجامعة المصرية وخد الدكتوراه، وسافر فرنسا مع بعثة علشان يدرس الآداب، وعلم النفس، والتاريخ الحديث سنة 1914، واتجوز سوزان بريسو اللي ساعدته في حاجات كتيرة جدًا زيّ معرفة اللغة الفرنسية واللاتينية.
رجع لمصر سنة 1919، وجاله عروض عمل كتيرة جدًا، لكنه ماكملش فيهم، زيّ أستاذ للتاريخ واللغة العربية، وعميد لكلية الآداب، ووزير المعارف، ومحرر في جريدة “كوكب الشرق”، وكان طه حسين بيدعو للنهضة والتقدم، وإن إحنا نجدد أدبنا وأفكارنا العربية، ونغير في طريقة التعليم ومانتمسكش بالطريقة التقليدية، وكان معروف إن آرائه جريئة وصريحة، وقدر يوسع وينقل التفكير المصري والعربي من القديم للحديث، وفي ناس اتهمته إنه ملحد، لكنه ماهتمش بالاتهامات دي وكمل مهمته في الدعوة للتقدم.
طه حسين كان معروف عنه إن طريقة كتابته سهلة وواضحة، من غير ما يخرج عن قواعد اللغة، ومن أشهر أعماله: السيرة الذاتية الرائعة “الأيام”، و”في الشعر الجاهلي”، و”مستقبل الثقافة في مصر”، و”أحاديث”، و”المعذبون في الأرض”، و”دعاء الكروان”، و”مع المتنبي”.