نفسك في أكلة جديدة وتكون صحيّة عالسحور؟ متقلقش الوصفات دي هتغيرلك حياتك!

في رمضان، أهم وجبة مش بتكون الفطار، لا، بالعكس.. وجبة السحور بتكون أهم وجبة في اليوم لإن هيّ الوجبة اللي هتتعايش بيها أكتر من 12 ساعة لحد ميعاد الفطار، فلازم طبعًا تكون وجبة صحيّة فيها كل اللي ممكن تحتاجه من العناصر الغذائية اللي تقدر تعينك على رحلة الصيام الصعبة، وفي نفس الوقت لازم تكون وجبة خفيفة متحسسكش إنك تقيل أو تسببلك عدم راحة.

أهم حاجة في وجبة السحور إنك تحاول تتجنب السكريات المُصَنعة زي الحلويات بأنواعها والسكر الأبيض، وممكن تستبدله بسكر طبيعي من فواكة وخضروات زي التمر أو البطيخ الأحمر اللي فوايدهم لا تعد ولا تحصى. لازم برضه تتجنب الزيوت الغير صحية وتستبدلها بزيت زيتون أو جوز هند، وتحاول يكون في دهون صحية اللي ممكن تحصل عليها من الأفوكادو والمكسرات.

مهم جدًا إن وحبة السحور بتاعتك يكون فيها بروتين لإن البروتين بيساعد على إنك تحس بالشبع لفترة أطول. البروتين ممكن تحصل عليه من البيض أو العدس أو الزبادي. وطبعًا لو فيه حبوب كاملة زي الشوفان هيساعدك توفر لجسمك سكريات صحية تقدر تقويك في فترة الصيام

مسقعة بالباذنجان بالباشميل

الباذنجان هي أكلة مليانة فوائد من فيتامينات لمعادن وألياف، وبالرغم من كل ده فالسعرات الحرارية بتاعتها قليلة جدًا. قطعة الباذنجان الواحدة فيها من 20-25 كالوري بس. الأكلة دي بتساعد على الهضم وبتحسن صحة قلبك وبتحسن العضم وبتقلل من فرص الإصابة بالأنيميا.

خبز بالزيتون

الزيتون غني جدًا في فيتامين إي ومضادات الأكسدة وبيحمي ضد مرض السرطان وهشاشة العظام. الـ 100 جرام الواحد فيه حوالي 100 كالوري. ناس كتير فاكرة إن الزيتون بيزود الوزن بس ده مش حقيقي، الزيتون فيه دهون مفيدة ليك زي اللي في الأفوكادو والمكسرات.

بيض بالمشروم

البيض مصدر مهم جدًا لفيتامين دي وبي 6 وبي 12 دا غير المعادن زي الزينك والحديد و النحاس. صفار البيض غني بالسعرات الحرارين والدهون عن البياض وبيحتوي على فيتامين أ ود وإي وك.

سلطة زبادي بالأفوكادو

الأفوكادو مليان فيتامين ج، ود، وك وعدد كبير من المعادن والعناصر الغذائية التانية المفيدة ليك. دا غير إن الأفوكادو يعتبر مصدر مهم جدًا للدهون المفيدة.

فطائر سبانخ

السبانخ من أكتر الخضروات الصحية اللي ممكن تاكلها، فهو مليان بالفيتامينات والمعادن والعناصر الغذائية التانية اللي جسمك محتاجها وقليل في سعراته الحرارية.

عصير قمر الدين

بالرغم من إن قمر الدين -اللي بيكون معمول من المشمش في الأصل- غني في السعرات الحرارية إلا إنه مهم جدًا كمصدر للطاقة في الصيام. كمان قمر الدين مصدر مهم جدًا للكالسيوم والحديد عنصرين مهمين جدًا لجسمك.

المهلبية

المهلبية أكلة محبوب جدًا في العالم العري، وهي كمان مفيدة عشان فيها عناصر مهمة كتير زي الكالسيوم والفيتامينات وبتحمي من هشاشة العظام، وممكن كمان تساعدك تخسر وزن لو استخدمت لبن خالي من الدسم.

أخر كلمة: الوصفات كلها بالتفصيل هنا! متنساش تعرفنا أنهي وصفة ناوي تعملها!