معظم الناس لما بتفكر إنها تستثمر فلوسها علشان تزود بيها دخلها ياما بتفكر في مشاريع خاصة أو تشتري شهادة ادخار من البنوك، ولكن مع ظروف كورونا واللي حصل في أول الأزمة على مستوى العالم كله، خلى الناس تروح للشهادات أكتر باعتبارها مضمونة أكتر من المشاريع الخاصة.. فتعالوا نعرف ايه الشهادات الادخارية اللي ليها أعلى عائد في البنك الأهلي وبنك مصر.
البنك الأهلي المصري
شهادة أمان المصريين
ودي الحد الأدنى لشرائها 500 جنيه ومضاعفاتها والحد الأقصى ليها 2500 جنيه، ومدتها 3 سنين، والفايدة نسبتها 16% وبتتصرف في أخر مدة الشهادة، والعميل مينفعش يأخد قرض أو بطاقة ائتمان بكل أنواعها بضمان الشهادة دي، وتسترد الشهادة بكامل قيمتها في نهاية المدة، ولكن العميل ممكن يستردها في أي وقت بنفس القيمة اللي اشتراها بيها، وكمان الشهادة دي بتقدم وثيقة تأمين على الحياة للعميل من سن 18 لـ 59 سنة وبدون كشف طبي، وبيتم سداد قيمة قسط التأمين الشهري من عائد الشهادة، والوثيقة بتسقط لو العميل استرد الشهادة أو عدى سن الـ 60، وفي حالة وفاة العميل المؤمن عليه بيستحق ليه تعويضات بحد أقصى 50 ألف جنيه لحالة الوفاة الطبيعية، و250 ألف للوفاة بحادث.
الشهادة البلاتينية
أقل قيمة ممكن تشتريها بيها 1000 جنيه ومضاعفاتها وملهاش حد أقصى، ومدتها 3 سنين، والفايدة لو كل شهر هتكون نسبتها 12%، ولو ربع سنوي (كل 3 شهور) هتبقى نسبتها 12.25%، ومن مميزاتها إن الفايدة ثابتة طول مدة الشهادة وبيتم احتسابها تاني يوم بعد ما تشتري الشهادة، وبضمان الشهادة دي ممكن تأخد قرض من أي فرع للبنك أو تصدر بطاقة ائتمان بكل أنواعها، ولو العميل عايز يستردها مينفعش يستردها قبل ما يعدي 6 شهور على تاريخ شرائها، وبُتسترد الشهادة بقيمتها بالكامل في نهاية المدة.
الشهادة الخماسية ذات العائد الشهري
ودي بتبدأ من 1000 جنيه ومضاعفاتها، ومدتها 5 سنين، والفايدة كل شهر نسبتها 10.25%، وبتكون ثابتة طول مدة الشهادة وبيتم احتسابها من تاني يوم بعد شراء الشهادة، وكمان العميل ممكن يأخد قرض أو يطلع بطاقة ائتمان بضمان الشهادة، ولكن مينفعش يسترد الشهادة قبل ما يعدي 6 شهور من تاريخ شرائها، وبُتسترد الشهادة بالكامل في نهاية المدة.
بنك مصر
شهادة أمان المصريين
بتبدأ من 500 جنيه ومضاعفاتها لـ 2500 جنيه، ومدتها 3 سنين، والفايدة بتاعها نسبتها 16%، وبتتصرف في أخر مدة الشهادة، ومينفعش العميل يأخد قرض أو بطاقة ائتمان بكل أنواعها بضمانها، وتسترد الشهادة بكامل قيمتها في نهاية المدة، ولكن العميل ممكن يستردها في أي وقت بنفس القيمة اللي اشتراها بيها، ومن مميزاتها إنها بتقدم وثيقة تأمين على الحياة للعميل من سن 18 لـ 59 سنة وبدون كشف طبي، وبيتم سداد قيمة قسط التأمين الشهري من عائد الشهادة، والوثيقة بتسقط لو العميل استرد الشهادة أو عدى سن الـ 60، وفي حالة وفاة العميل المؤمن عليه بيستحق ليه تعويضات بحد أقصى 50 ألف جنيه لحالة الوفاة الطبيعية، و250 ألف للوفاة بحادث.
شهادة القمة
ودي أقل قيمة لشرائها 1000 جنيه ومضاعفاتها، ومدتها 3 سنين، والفايدة ياما شهرية نسبتها 12%، ياما ربع سنوية 12.25%، والفايدة ثابتة طول فترة الشهادة، وممكن العميل ياخد قرض من البنك بضمانها، وكمان ممكن يسترد قيمة الشهادة أو جزء منها حسب قواعد الاسترداد الخاصة بيها.
شهادة الادخار ذات العائد الثابت لمدة 7 سنوات
بتبدأ من 750 جنيه ومضاعفاتها، ومدتها بتبقى 7 سنين، والفايدة كل شهر ونسبتها 9.75%، وبتكون ثابتة طول فترة الشهادة، وممكن العميل يسترد قيمة الشهادة أو جزء منها حسب قواعد الاسترداد الخاصة بيها.