انتشر في الساعات اللي فاتت خبر عن ميعاد طرح وسيلة مواصلات بديلة للتوكتوك. وده بعد ما طلع المتحدث باسم وزارة الإنتاج الحربي في مداخلة هاتفية وقال معلومات عن الوسيلة الجديدة وازاي هتبقى بديل أحسن عن التوكتوك في مصر.
- بتعتبر عينة لمشروع مقترح تنفيذه بين الهيئة القومية للإنتاج الحربي وواحدة من شركات القطاع الخاص «جى بى أتو غبور». علشان يوفر مركبة “وسيلة” بديلة بأربع عجلات غير التوكتوك.
- البديل الجديد هيشتغل بنظام ثنائي يعني بنزين وغاز طبيعي وده ضمن خطة علشان يتوسعوا في استخدام الغاز الطبيعي كوقود للعربيات. بجانب إن في خطة قريبة لاستخدام الكهربا.
- من ضمن مميزاته إنه هيكون مناسب في الأماكن الضيقة والطرق الغير مرصوفة.
- ده غير إنه يقدر يقطع مسافة بتوصل لـ550 كم من غير ما يحتاج إنه يتملي تاني.
- قليلة في التكلفة من حيث النقل والتشغيل يعني صديقة للبيئة.
- المركبة “بديل التوكتوك” واخدة شهادة E-Mark الأوروبية “الهيئة العامة للرقابة على الصادرات والواردات” وشهادة الاعتماد للهيئة العامة للمواصفات.
- في نص السنة الجاية المفروض إن البديل ده هيشتغل بالمحرك الكهربائي.
عدد التكاتك في مصر وصلت لـ 3.5 مليون للتقديرات الأوليّة. وفي قرار سنة 2014، كان بيمنع استيراد التوك توك بشكل كامل ومحاولة لتقنينه. بس الموضوع اتقسم بين مؤيد ومعارض للفكرة، مؤيد علشان في الفترة الأخيرة كان معظم حوادث القتل والسرقة كان واحدة من الوسائل المساعدة لها للأسف كانت التوكتوك. بس في نفس الوقت هو بيعتبر وسيلة مواصلات مهمة في الأماكن اللي من الصعب يدخل لها عربيات وكمان بيساعد بشكل أو بآخر في تقليل نسبب البطالة لناس كتير بيعتبروه وسيلة للرزق وللمعيشة.
