الكوميديا ممكن تكون مفهوم نسبي بيختلف باختلاف طبيعة كل شعب، وطبيعة الفترة الزمنية والجيوغرافية والسياسية اللي بتسيطر على واقع الشعب ده وثقافته في لحظة معينة من الزمن، ولكن في أفلام أبيض وأسود كوميدية بتكون عابرة للزمان، مهما اتغيرت كل العناصر المحيطة بالعمل الكوميدي ده بيفضل يضحك الناس، يمكن لإنه بيعتمد على كوميديا إنسانية أساسية مش بتتغير مع الزمن، وبيعتمد على الإنسان وطبيعته الأصلية اللي بتفضل هي هي مهما اتغير الزمن والواقع من حوليه.
وعلشان الكوميديا في أفلام أبيض وأسود كتير طلعت لنا عبقريات على مدار الزمان، احنا النهارده بنحتفل بسبع أفلام مصرية أبيض وأسود ما زالت بتموتنا من الضحك برغم إنه عدى عليها زمن طويل جدًا.
فيلم عنتر ولبلب: إنتاج 1952
لبلب عايش حياة جميلة وهادية فى حي شعبي وعنده مطعم بيكسب منه حلو، وعلشان كده اتشجع واتقدم لطلب ايد لوزة بنت المعلم رضوان، كل حاجة هنا كويسة وماشية حلو مع لبلب، لكن في يوم ييجي الحي رجل عنيف اسمه شمشون، وده رجل قوي وعضلات وجتة، يفضل يخوف أهل الحي اللى عايش فيه لبلب اللي جسمه صغير وتحسه كتكوت جانب شمشون.
ولبلب رجل طيب على عكس شمشون الغني والمفتري، واللي ساكن فى قصر، المهم يتحدى لبلب الشاب المسكين الضعيف شمشون القوي واللى ينافسه على قلب حبيبته لوزة، وتبدأ المعركة بينهم من خلال رهان على إن اللي يضرب التاني سبع أقلام الأول يفوز بقلب لوزة.
شمشون يستغل قوته وثروته لكن لبلب يستغل ذكائه علشان يهزم شمشون في إطار كوميدي واجتماعي وتشويقي.
الأبطال: محمود شكوكو وسراج منير وعبد الفتاح القصرى
فيلم حرام عليك: إنتاج 1954
الفيلم هو اقتباس للقصة الغربية عن وحش فرانكشتاين والرجل المستذئب، لكن في إطار مصري كوميدي أصيل جدًا وعابر للزمن، ويقدر يضحكك في أي وقت.
والفيلم بيحكي عن إسماعيل وعبدالفتاح القصري اللي بيشتغلوا في محل لبيع الآثار، ويجيبوا صندوق فيه مومياء، وبيراقبهم رجل عامل نفسه عالم آثار “استيفان روستي، في دور بروفيسور عاصم”، وإنه يقدر يخلي المومياء دي ترجع للحياة، وعنده بنت أخ مخطوبة لدكتور، يلعن البروفيسور عاصم الدكتور ده ويخليه يتحول لمستذئب كل ما القمر يبقى بدر علشان يجبره على مساعدته في استخراج مخ شخص حي، ويحطه في المومياء، وطبعًا المخ المطلوب هو مخ إسماعيل، ومن هنا الكوميديا بتفضل تتصاعد لأخر الفيلم.
الأبطال: إسماعيل ياسين وعبدالفتاح القصري واستيفان روستي وسناء جميل.
فيلم إسماعيل ياسين في الأسطول: إنتاج 1957
أحداث الفيلم كلها عن إسماعيل ياسين الشاب الواقع لشوشته في حب بنت عمه بس والدتها رافضة الحب ده وممانعة تمامًا لفكرة الجواز وبتحاول تجوزها لرجل كبير في السن وغني، فتقول البنت تطلب من ابن عمها اللي عايزة تتجوزه إنه يتطوع في الأسطول علشان يبقى عنده السلطة إنه يمشي كلمته ويتجوزها، وبالفعل يروح إسماعيل ياسين يتطوع في الأسطول وتبدأ الكوميديا تظهر في التناقض ما بين شخصية إسماعيل البسيطة والمرحة، وقسوة وانضباط جنود البحرية.
الأبطال: إسماعيل يس وزهرة العلا ورياض القصبجي “الشاويش عطية”.
فيلم طاقية الإخفاء: إنتاج 1959
هو فيلم كوميدي بيعتمد على الفانتازيا وبيحكي عن صحفي معاه طاقية اللي يلبسها بيختفي على طول، والطاقية دي ظهرت لما عفريت اتحرق فوق طاقية أخوه الصغير، بس المشكلة إن في واحد بيستولى على الطاقية وبيستخدمها لأغراض شريرة زيّ السرقة، وبتبدي الكوميديا في إطار من المطاردات والمشاهد الخفيفة.
الأبطال: عبدالمنعم إبراهيم وتوفيق الدقن وزهرة العلا.
فيلم فتافيت السكر هانم: إنتاج 1960
قصة كوميدية عن الحب والجواز والطبيعة البشرية، ويبدأ باتنين شباب عزاب نبيل وفريد، اللي بيطلبوا من صاحبهم سكر “عبدالمنعم إبراهيم” إنه يستغل مواهبه في المسرح والتنكر بإنه يعمل واحدة ست ويعمل نفسه قدام الناس إنه عمة فريد اللي اسمها فتافيت السكر، علشان يقدروا يعزموا جاراتهم اللي بيحبوهم للبيت، بس الخدعة بتقلب عليهم والموضوع يتحول لمشكلة كبيرة لما ترجع عمة فريد الحقيقية، مدام فتافيت السكر هانم من أمريكا وتطب عليهم، ومن هنا تبدأ الكوميديا في التصادم ما بين كل الشخصيات دي حولين الحقيقة.
الأبطال: سامية جمال وزوزو ماضي وكريمان وعبد المنعم إبراهيم وكمال الشناوي وعمر الحريري وحسن فايق.
فيلم إشاعة حب: إنتاج 1961
بتحكي أحداث الفيلم عن حسين “عمر الشريف” الشاب الخجول والمرتبك واللي بيحب بنت عمه سميحة (سعاد حسني) حب مش معقول، بس سميحة مش مهتمة به ومش قادرة تشوفه وبتحب ابن خالتها لوسي، الشاب الكوول اللي بيعرف يرقص ويغني، لكن عم حسين، اللي هو أبو سميحة “عبد القادر النشاشجي”، يوسف وهبي، بيحب ابن أخوه حسين أوي وشايف فيه شخص مثالي يكون زوج لبنته، ويبدأ رحلة تحويل حسين لرجل كوول يقدر يجذب نظر بنته سميحة، ويرسم خطة ويبدأ ينشر إشاعة إن حسين على علاقة بالممثلة المشهورة هند رستم.
وتبدأ الكوميديا ما بين كل الشخصيات في تصادمهم مع بعض ومع الخطة المرسومة والإشاعة اللي انتشرت في كل حتة في القاهرة وبقوا مش قادرين يسيطروا عليها.
الفيلم مقتبس من مسرحية حديث المدينة (The Whole Town’s Talking).
فيلم أخطر رجل في العالم: إنتاج 1967
مستر إكس هو رئيس عصابة دولية للتهريب في شيكاغو وبيوصل للقاهرة علشان يعمل صفقة بس مايعرفش إن رجال الشرطة المصرية بيتعاونوا مع الإنتربول علشان يقبضوا عليه، ويظهر زكي، موظف غلبان في المطار شبه مستر إكس بالظبط، فتطلب الشرطة من زكي إنه يساعدهم في مهمتهم وتبدأ الكوميديا في إطار من المطاردات.
على مدار أكتر من 120 سنة، هي عمر السينما المصرية، قدمت لنا أفلام عظيمة، منها الكوميدي ومنها التراجيدي ومنها الدرامي، ودول 7 من أحلى الأفلام الكوميدي الأبيض وأسود من وجهة نظرنا، أنت إيه رأيك؟ إيه أحلى فيلم كوميدي أبيض وأسود شفته؟