بعد ما شوفنا الممثلة السورية سارة نخلة بتحكي عن تجربتها في أخذ مصل الكلب بعد ما عضها كلب، واتجهت لمستشفى علشان تاخد المصل المضاد لعضة الكلب، ولقته متوفر في مستشفى حكومي، وبالمجان، وقدرت تحصل عليه بسهولة من غير انتظار، وهتحصل على الجرعة كاملة اللي بتتكون من 5 حقن، وتم تحديد مواعيد الحقن التالية ليها، علشان كده، حبينا نتكلم عن لقاحات وأمصال علاج مختلفة بتقدمها وزارة الصحة المصرية بالمجان من غير أي مقابل، بتنقذ بيها حياة ناس كتير.
مصل الكلب
في حال انتقال المرض من الحيوان للمصاب عبر اللعاب، حتى لو كانت عن طريق عضة بسيطة، ماينفعش تستهين بيها لإنها مرض خطير ومميت، علشان كده وزارة الصحة بتوفر مصل للمصاب بعضة من الكلب في المستشفيات الحكومية، بيكون كورس من 5 حقن، والمستشفى بتديه للمصاب فور وصوله، وبتحددله المواعيد للحقن التالية بكارت مرفق مع المريض يقدر ييجي ياخد الحقن في مواعيدها في المستشفى.
مصل الالتهاب الكبدي الفيروسي (ب)
لإنه مرض فيروسي حاد، بيهدد حياة المريض بيه، وزارة الصحة بتقدم المصل الخاص بيه بالمجان، من خلال المستشفيات الحكومية والوحدات الصحية، للحد من انتشار الفيروسات الوبائية وأمراض الكبد، كمان مع الحملات اللي بتشنها الدولة لعلاج فيروس سي، كل دي خطوات في علاج أمراض خطيرة بتهدد حياة المواطنين.
مصل الثعبان
في حالة التعرض للدغة ثعبان، بيتم التوجه بسرعة لأقرب مستشفى حكومية أو وحدة صحية، علشان تاخد المصل المضاد للدغة بأقصى سرعة لعدم التعرض لأمراض خطيرة أو تسمم نتيجة اللدغة، وده طبعًا بالمجان.
مصل العقرب
لدغة العقرب كمان من أخطر الحاجات اللي ممكن يتعرض لها الإنسان، وفي الحالة دي برضه بيتم التوجه لأقرب وحدة صحية أو مستشفى حكومية علشان المصل المضاد للدغة العقرب.
مصل التسمم الممباري
في حالة التسمم الغذائي، بيتكون من نوع من البكتيريا، واللي بتسبب سم شديد الخطورة، بتؤدي للوفاة في وقت قصير، وبتؤكد وزارة الصحة توفر مصل التسمم في المستشفيات الحكومية بالمجان، علشان يتم إنقاذ عدد أكبر من الناس اللي بيتعرضوا له في أسرع وقت.
مصل التيتانوس
عدوى بتصيب الإنسان عند دخول أنواع بكتيريا معينة لمجرى الدم من خلال الجروح، بتنتقل للجهاز العصبي وبتفرز مادة بتمنع وصول السيالات العصبية للعضلات، مرض خطير بتتضاعف أعراضه وتمثل خطر أكبر لو المريض ماخدش المصل الخاص بيه، علشان كده لازم يتوجه لأي مستشفى حكومي يتلقى المصل مجانًا.
مصل الحيات
باختلاف أنواعها، وزارة الصحة بتقدم المصل الخاص بعضة أو لدغة الحيات، في المستشفيات الحكومية التابعة للوزارة، وبعض الوحدات الصحية.