يوم 2 يناير هو اليوم الوطني الأمريكي للاحتفال بالشخص الانطوائي، صاحبك الكتوم والهادي واللي دايمًا بيفكس خروجات ويختار ترابيزات في آخر المطعم، وعنده عادات عجيبة كده، وعلشان ماتخنقهوش ويفضل يحبك، بنقولك 6 حاجات ماتعملهاش مع شخص انطوائي.
ماتعملوش حفلة في عيد ميلاده
إحنا مقدرين إنك عايز توجّب معاه وتبينله إنك بتفكر فيه، بس هو مابيحبش الهيصة واللمة والناس الكتير، واللي مابيحبهوش أكتر إن يكون مركز الانتباه وفي نص الحدث كده، جيب للانطوائي هدية، أو اعزمه على أكلة حلوة، اعمله لمة عالضيق في بيت واحد صاحبكم أوي، الشخص الانطوائي ساعتها هيبقى في قمة انبساطه.
ماتقدمهوش لشلة جديدة
صاحبك الانطوائي محافظ على علاقته بيك انت بالعافية، ماتروحش تجيبله مجموعة أشخاص جديدة مرة واحدة كده، يدخلوا حياته ويعملوا دوشة وجروب واتساب ونوتفيكيشن وهيصة ونرتب خروجات، هتشوف منه وش مش هيعجبك.
تعرف منين إن صاحبك انطوائي:
- بيحب يكلمك شات بس مايردش على مكالماتك.
- بيفكس الخروجات اللي بيتخطى عدد سكانها 4 أفراد هو منهم.
- قليل الرغي وسط الناس، وماتعرفش تسكته وانتوا لوحدكم.
- دبش وبيرمي زلط وبيستغرب هي الناس بتزعل ليه.
- دودة كتب أو مسلسلات أو مزيكا، وتلاقي ذوقه حلو ومميز وعنده معلومات كتير.
- حكيم ورزين كده وتحب تسمع رأيه في المواقف والناس.
ماتقعدش تسأله مالك
يا حبيبي هو مش زعلان، هو وشه كده، وده بجد والله، الشخص الانطوائي في تفسير علماء النفس، شخص عنده خلل رفيع كده في استخدام تعبيرات وشه، آخره في الانبساط ابتسامة، لا بينط من الفرحة ولا بيصرخ لما الأهلي بيجيب جول، وفي الأفراح لو قام من مكانه وسقف في نص الدايرة.. اعرف إنه بيحبك جدًا.
ماتحاولش تغيره
الشخص الانطوائي مش مريض نفسيًا ولا عنده حاجة بايظة وعايزه تتظبط، ده نمط شخصية طبيعي وصحي ومش بسبب أي صدمات في الطفولة ولا وقع على دماغه مثلًا، فمتحاولش تغيره وتفرض عليه مواقف مش مريحة أو مواجهات مش عايزها، لإن دي أسرع طريقة تخرجك من دايرة المقربين ليه وتحسسه إنك مش قابله زيّ ما هو.
ماتقتحمش قوقعته
لو قرر الشخص الانطوائي إنه يقفل تليفونه وينعزل، سيبه يعمل كده، دي تقنية هو بيستخدمها علشان يتخطى زعله ويرتب أفكاره ويستريح، الانطوائي بيتعب وسط الناس وبيبذل مجهود علشان يقعد في تجمع عائلي ولا يحضر فرح حد، فمن وقت للتاني بيحتاج يتقوقع ويقعد براحته مايشوفش وش حد، لو لقاك متفهم ومش زنان، هيحبك أوي.
ماتطلعهوش على المسرح
لو الشخص الانطوائي ليه شلة من القريبين وربنا كرمكم ونزل معاكم، ماتطلعهوش على المسرح وتسفوا عليه، إحنا عارفين إنها عادة كل شلة ومش قاصدين حاجة، بس دي نصيحة أخوية لو يهمكم تشوفوه على الأسفلت معاكم تاني.