الشتاء فصل صعب، الجو برد ومليان غيوم معظم الوقت، ومع الجو ده بتكتر الأمراض وبينتشر الكسل وبتبقى طاقتنا أقل من العادي بكتير، ومع كل الحاجات دي بييجي الإحساس بالاكتئاب الموسمي علشان يكمل علينا. العلماء بيقولوا إن نقص الطاقة أو الحرارة من الجو هو اللي بيسبب كل المشاكل دي بما فيها الاكتئاب، وده لإن نقص الطاقة حولينا كبشر بيحسسنا بتهديد الفناء فبنحس برغبة أقل في الحياة، اللي المفروض تكون حاجة حيوية ونشيطة ومتحركة.
رغم إن الشتاء فصل صعب وممكن يكون مدمر لبعض الناس إلا إننا ممكن نعمل حاجات بسيطة تساعدنا نتخطى قسوة الفصل ده ونبقى مبسوطين فيه، حتى لو ماكناش بنحبه خالص.
الأكل الصحي صديق الشتاء
الأكل أهم عنصر في يومنا، وبالذات في الشتاء، علشان جسمنا بيستهلك طاقة كتير أوي يعوض من خلالها الطاقة اللي فقدها في محاولة تدفئة نفسه، فلازم ناكل وجبات متوازنة وفيها كالوريز أو سعرات حرارية كتير علشان نعوض الطاقة الناقصة دي وندفي نفسنا. ولما نكون دافيين وعندنا طاقة كافية ده تلقائي هيحسن المود بتاعنا علشان زيّ ما قُولنا البرد ونقص الحرارة والطاقة هو سبب مباشر في الاكتئاب والمود الوحش.
الرياضة بتهون الشتاء
حركة الجسم والرياضة بترفع كفائة الدورة الدموية وده بيساعد على تنظيم حرارة الجسم وتنقيته من السموم وكمان بيحفز الهرمونات اللي بتظبط المود وبترفع من كفاءة جهازنا العصبي فبتخلينا نشوف العالم بشكل أحسن وبيقلل الضغط والتوتر والقلق. غير إنه كمان بيدفينا. اللبس الدافي والشيك
لازم نلبس لبس دافي علشان نتجنب الإحساس بالبرد واللي بيخلينا نكتئب ونتضايق، ولازم نلبس حاجات مريحة وشكلها حلو ومرتاحين فيها علشان نحس إحساس أحسن ناحية نفسنا وده بيساعدنا نواجه الضغوطات والتوتر والقلق اللي بيكون مالي الجو في الشتاء.
العلاقات
العلاقات بتبعث شكل من أشكال الدفء النفسي. فعلًا الحب والمشاعر الجميلة ما بين الناس بيدفي القلب. لازم نحافظ على العلاقات الدافية دي، سواء مع أصحابنا وأهلنا وحبايبنا. لما نبقى موجودين طول الوقت حولين ناس بنحبهم، الحب ده بيملى الجو وبينعكس على مشاعرنا ناحية نفسنا وبيحسن مودنا وبيخلينا مبسوطين من غير أي مجهود.
المزيكا
المزيكا من أكتر الحاجات اللي قادرة تغير مودنا وتأثر على مشاعرنا وعلشان كده لازم نتأكد إن المزيكا اللي بنحبها تكون عنصر أساسي في يومنا، ولو نختار مزيكا دافية وفيها مشاعر جميلة وسعيدة ده هيساعدنا نتخطى اكتئاب الشتاء بسهولة.
الشمس
الشمس هي مصدر الحياة على كوكب الأرض وعلشان كده غياب أشعة الشمس عننا لوقت طويل بيأثر على صحتنا الجسمانية والنفسية بشكل كبير جدًا. لازم نتعرض لأشعة الشمس وقت كافي كل يوم علشان نحس بالحياة ونحسن صحتنا الجسمانية والنفسية.