7 أماكن في مصر هتساعدك تقرأ بذهن صافي

القراءة عايزة مننا دماغ وتركيز علشان نسرح فيها ونتوه ونتخيل كل كلمة بيقولها الكاتب، مش في أي وقت ممكن نقرأ ولا أي مكان، محتاجين دماغ صافية ومكان مناسب وهادي علشان نروح مع الكتاب في رحلته ونشوف هو عايز يقول لنا إيه بين سطوره. ومش دايمًا الناس بتحب تقرأ في البيت، ساعات بيحبوا يجمعوا ما بين أكتر من حاجة في مكان واحد؛ أخرج وأشرب حاجة خفيفة واستمتع بالأجواء اللي حواليا وكمان أقرأ كتابي. وعلشان ماتحتارش كتير، جبنالك أماكن هادية بتجمع ما بين حاجات كتير وفي نفس الوقت مناسبة للقراءة.

سبيس – المنصورة

مكان في الأساس مخصص لمساحات العمل، تقدر تشتغل فيه وتقرأ بهدوء مع مزيكا هادية بتبقى شغالة بتعمل جو للمكان. الديكور كله ألوان، وأنت ماشي فيه، هتلاقي quotes “اقتباسات” على الحيطة تحسسك بجو من النوستالجيا شوية. عندهم بين باجز وترابيزات عالية، وفي أوضتين مقفولين ممكن ينفعوا لو حابب تقعد لوحدك، وفي هناك جاليري صغير في حاجات بسيطة.

الفرد عندهم ب50 جنيه، وبتقعد الوقت اللي تحبه، وليك مشروبات تقدر تشربها من ضمن ال50 جنيه، وفي واي فاي، ومواعيدهم من 10 الصبح لـ11 بليل كل يوم. ومكانهم في حي الجامعة، شارع وكالة أبو رية، جنب مستشفى محمود التخصصي الدور الرابع، ودي أرقامهم 01069613751 / 01150685861.

ديوان فرع المعادي – القاهرة

مكان متكامل جمع ما بين مفهوم المكتبة والكوفي شوب، عندهم قاعدتين؛ جوا المكتبة وفي ترابيزات وكراسي، وكمان تقدر تحضر ندوات بيعملوها وحفلات توقيع كتبو، عاملين قاعدة برا تقدر تقعد فيها وتقأ الكتاب في هدوء، ولو القعدة طولت معاك، في عندهم زيّ مطعم صغير جوا فيه عصاير وكيك وسلطات صحية تسليك.

عندهم أنواع مختلفة من الكتب في الأدب والسياسة والتاريخ والفلسفة، والأسعار بتختلف على حسب الكتاب لو عربي أو إنجليزي أو بأي لغة تانية أو مترجم أو لأ. ومش هتلاقي عندهم كتب بس، لأ ده في كمان منتجات هاند ميد ومجات وشنط ومفكرات وبوك مارك وشمع ينفع للديكور.

المكان مفتوح يوميًا من 9 الصبح ل11 بليل، والعنوان بالظبط: 1 شارع 245، تقاطع شارع 213، دجلة المعادي، وتقدر تكلمهم على تليفون 01226000168.

مكتبة مصر العامة – بورسعيد

مكان هادي وواسع تقدر تقرأ فيه براحتك، سواء لو هتقعد جوا في الأماكن المخصصة للقراءة أو هتقعد في جنينة المكتبة وتقرـ وسط الخضرة والطبيعة. كمان عندهم مجموعة مختلفة من الأدب العربي والإنجليزي والفلسفة والتاريخ وتعليم اللغات والتربية النفسية مش موجودة في حتة تانية. هناك في اشتراك سنوي رمزي، وتقدر كمان من خلال الاشتراك ده تستعير كتب لمدة أسبوعين، ده غير الأنشطة الرياضية والصيفية اللي بيعملوها هناك.

المكان متاح الفترة من 9:30 الصبح لحد 8.30 بليل، ويوم الجمعة في فترة مسائية من 2 الضهر لحد 8 بليل، والاتنين إجازة رسمية. المكتبة موجودة في شارع عاطف السادات، طرح البحر جنب مجمع المطاعم.  

جاليس – إسكندرية

مكان تقدر تذاكر وتشتغل فيه وتقرأ اللي أنت عايزة، كل ركن وأوضة في المكان له ديكور ولمسة مختلفة، هتلاقي الكراسي بتاعة القهاوي والأبواب القديمة وهتلاقي الكراسي العالية والبين باجز والكنب لو عايز قاعدة مريحة. وفي ديكور هناك معمول مخصوص علشان الناس تتصور، ومؤخرًا عملوا ديكور جديد للست أم كلثوم والخلفية “وصفولي الصبر”، وأنت قاعد على صالون قديم.

فاتحين كل يوم من 10 الصبح لـ12 بليل، والعنوان 18 شارع جاليس، متفرع من شارع كلية الطب، قدام مكدونالدز في محطة الرمل.
ودي أرقامهم 034847099 – 0103274329، الفرد عندهم طول اليوم بـ15 جنيه، وممكن تاخد معاك أكلك بس المشروبات لأ، علشان عندهم وبسعر رمزي برضه.

هيدا – الزمالك

لو حابب تقضي يوم مختلف تقرأ قدام النيل ومنك للسماء، فعليك وعلى “هيدا”، مكان لبناني هينقلك لبيروت؛ الأكل والأجواء وكل حاجة، ممكن تاخد الترويقة الصبح من عندهم وتشرب حاجة تنعشك وبعدين تبدأ في كتابك أو روايتك. وعندهم كمان فقرات غنائية بتتقدم على العود لو حابب تفصل شوية من القراءة، المكان في جوا وبرا لو حابب تغير قعدتك، والديكور والصور والتابلوهات هيعيشوك في شوارع لبنان.

المواعيد من 9 الصبح لواحدة الصبح، وفي موقف للعربيات، وفي إنترنت. العنوان 139شارع النيل, الفور سيزون, ورا السوق.

مشروع ياسمين – إسكندرية

ميزة المكان ده إنه دورين؛ دور مقفول ومكيف والدور التاني على السطح. لو بتحب تقرأ منك للسماء كده وتتخيل مع نفسك في مكان مفتوح، روح هناك، والإضاءة بليل بتبقى هادية. وفي رمضان والمناسبات شكل القعدة بيتغير وبتبقى قعدة عرب بمخدات على الأرض. لو قعدتك طولت في المكان تقدر تطلب من المنيو بتاعهم أو تطلب أكل من برا ويجيلك المكان، عندهم أماكن مخصصة للتدخين وأماكن من غير، واليوم للفرد ب25 جنية.

مواعيده من ١٠ الصبح ل١٠ بالليل، وموجود في سبورتنج، شارع بورسعيد، الفيلا الملونة، قدام بنك القاهرة. وممكن تكلمهم قبل ما تروح ٠١٠٦٧٢٥٠٩٠١.

الكتب خان – القاهرة

المكان عبارة عن دورين، اللي تحت في ترابيزات باصة على الشارع، وفي ترابيزات زيّ المكاتب بتاعت زمان الكبيرة اللي بتقعد فيها وبيجمعها ناس كتير. والدور التاني في بلكونة هتحسسك بجو من الألفة، كإنك قاعد في بيتك ومنظر الشجر قدامك كإنك في جنينة، تقدر تشتري كتب بأسعار معقولة في منهم القديم والجديد، وأنت قاعد هتسمع مزيكا هادية تدخلك في مود قديم.

الفرد كحد أدنى خمسين جنيه اليوم كله، وفي فترتين؛ الفترة الأولى من 9 ل4 والتانية من 5 ل11 ونص. ماينفعش تجيب مشروبات معاك لإنها متوفرة، والعنوان 13 شارع 254 دجلة المعادي، جنب مركز سامية علوبة.

أخر كلمة: ماتفوتوش قراءة: الغوص في الحطام: أشهر أماكن حطام في البحر الأحمر تقدر تغوص فيها