تعريف “الجمال” دلوقتي بقي مقتصر -للأسف- علي معايير معينة زي الرشاقة والطول والشعر الناعم والطويل وحاجات تانية كتير. وفي حالة إن حد فشل في إنه يوفق المعايير دي، يبقي تلقائيًا وبالمعايير الموجودة هيتبصله بطريقة تحسسه إنه أبعد ما يكون عن الجاذبية. وفي سنة 2020، مينفعش نسمح لمعايير بشرية أبعد ما تكون عن المنطق هيّ اللي تحط مصنفات وتسميات اللي تقرر إحنا جمال ولا لأ.
علي قد ما الكلام ممكن يبان جميل ناس كتير ممكن تشوفوا مش واقعي، لكن في شخصيات قدروا يثبتوا ده علي أرض الواقع من خلال حبهم لنفسهم وتقبل شكلهم اللي مش بالضرورة يوافق قائمة الجمال بتاعت دلوقتي، ووقفوا علي أرض صلبة وقدروا يقنعوا الناس كلها بنجاحهم وثقتهم في نفسهم، وإن الجمال شيء نسبي وإن السر كله بيكمن في حبك لنفسك اللي بينعكس علي اللي قدامك وبيخلي الكل يشوفك أجمل واحد، بغض النظر عن أي حجم ممكن تتشاف “كعيوب” من البعض.
علي سبيل المثال لجينا صالح واحدة من مؤثرين السوشيال ميديا اللي مصابه بمرض البهاق إلا أنها فخورة بشكلها وبكل تفصيلة فيه ومبتلجأش حتي لاستخدام مستحضرات التجميل لتخبية لون جلدها المختلف ببساطة لأن هي حبًا نفسها زي ما هي، وعشان كده مش غريبة إنها من أكتر الشخصيات المعروفة والمحبوبة علي السوشيال ميديا.. لأنها عرفت سر الجمال الحقيقي، حب الذات.
ومن النماذج اللي بجد كلنا لازم نحطها قدامنا دايمًا كمثال يحتذي به في تقبل الذات وحبها لنفسها بالرغم من أي ظروف هي رانيا حماد مصممة الأزياء اللي فقدت رجل من رجليها من سنتين في حادث سيارة ومع ذلك حافظت علي صورتها الذاتية ومفقدتش شعورها بالجمال بالرغم من الحادثة. وتعتبر رانيا سفيرة للإجابية والتفائل، فدايمًا بتتكلم عن إن إزاي “الكمال شيء وهمي” وإن الشخص جماله بيكتمل بتقبله لنفسه وتقديره لشكله مهما كان.
أما بالنسبة لزيادة الوزن، فمن الناس اللي تحدت فكرت أن “أرقام الميزان” تبقي من مقاييس الجمال، كانت إنجي وجدان اللي عبرت أكتر من مرة عن ثقتها في نفسها وجاملها أيًا كان وزنها علي الميزان كان إيه، بالإضافة لأنها كانت من أوائل الناس اللي ردت ودافعت عن أصحاب السمنة لما حصل جدل في وقت من الاوقات علي الموضوع ده، غير إنها بتعمل حملات تحت اسم #انتي_جميلة_زي_ما_انتي اللي بتشجع فيها كل البنات إنهم يحبوا شكلهم مهما كان وبتعزز من خلالها ثقتهم في نفسهم. وبالفعل إنجي وجدان مبتخطيش خطوة في أي مهرجان أو مناسبة إلا وبتخطف الأنظار بجمالها وأناقتها.
واحدة من اللي دخلوا عالم الفن من وقت قريب لكن قدرت أن يكون ليها بصمة إيجابية وتعزز فكرة الثقة بالنفس وتقبل الشكل هي دنيا ماهر، أحد أبطال مسلسل “بـ 100 وش” اللي قدرت بدمها الخفيف وروحها الجميلة وطبعًا بكلامها الإيجابي عن موضوع الجمال بتضامنها مع حملة إنجي وجدان #انتي_جميلة_زي_ما_انتي إنها تقنعنا إننا نلبس اللي احنا عايزينوا ومنخليش حد يملي علينا نعمل إيه وشكلنا يبقي إزاي!
ومن الناس اللي اتحدوا البهاق كان محمود حسن اللي ماسمحش لمقاييس الجمال إنها تأثر علي حياته وشغله فهو حاليًا من أنجح الرجال في مجال عرض الأزياء. وكمان “كارن وازن” اللي بالرغم من إنها عندها نوع بسيط من البهاق إلا أنها مش بتحاول تداريه بالعكس قامت بمبادرة صغيرة خلال حسابها علي الإنستجرام شجعت فيه أي حد عنده بهاق بإنه يسلط الضوء على مكانه برسمة قلب، كمحاولة منها إنها تشجع الكل إنه يعتنق كل ما فيه بحب، واللي بالفعل كانت لاقت ردود إيجابية ومشاركات كتير من متابعينها اللي شاركوها الصور.
في نماذج كتير جدًا بيثبتوا لنا كل يوم قد إيه لازم نغير مفهومنا الخاطيء عن الجمال اللي بيخلي كتير مننا وأهم نفسه إنه مش كفاية، مع إن دايمًا الجمال بييجي من جوه مش من بره..