بطارية الموبايل بقت كلها دلوقتي جزء من الهاردوير بتاعه، يعني للأسف مابقاش في رفاهية تبديل البطارية لو باظت، ومعنى كده إن البطارية لو حصلت لها حاجة، الموبايل كله بقى ملوش لازمة. وعلشان كده الحفاظ على سلامة البطارية حاجة مهمة جدًا علشان تحافظ على تليفونك سليم وشغال كويس، والنهارده جبنالك 5 نصايح يساعدوك تحافظ على البطارية سليمة.
بلاش تستنى على بطارية التليفون لحد ما تفضى خالص والموبايل يقفل
أول ما الموبايل يديلك نوتيفيكيشن إنه محتاج يتشحن اشحنه على طول. بلاش تسيب الموبايل يخلص شحن ويقفل، لإن البطارية لما بتفضى خالص بتبدأ تكون أملاح على أقطاب الشحن وده بيخلي قدرتها على الشحن بتقل.
بلاش تشحن بطارية الموبايل لحد ما توصل 100%
لما تيجي تشحن الموبايل افصله من الشاحن قبل ما يوصل 100%، يعني خليه على 98% كفاية. لإن البطارية لما بتتشحن للحد الأقصى بتبدأ برضه تكون أملاح عند أقطاب الشحن وده بيخليها تبوظ بسرعة.
بلاش تستخدم الموبايل وانت بتشحنه
طالما الموبايل في الشاحن، ما تستخدمهوش خالص. سيبه يشحن لحد ما يخلص شحن قبل ما تعمل أي حاجة عليه. لما بتشحن البطارية وتستهلك الشحن اللي فيها في نفس الوقت ده بيخلي قدرتها على الحفاظ على الشحن بتقل، يعني هيخلي البطارية تسرب شحن، ولما البطارية تسرب شحن يعني بتستهلك طاقة في دايرة كهربائية مقفولة، ومعنى كده إنها بتبوظ.
بلاش تشحن البطارية قبل ما الموبايل يديلك نوتيفيكشن إنه محتاج شحن
لما تشحن البطارية وهي 50% مثلًا ده بيخلي البطارية تعمل دواير كهربائية مقفولة وتسرب شحن. من الأفضل إنك تشحنها وهي فاضية، بس مش فاضية يعني 0%. من الأفضل إنك تستنى على البطارية لحد ما توصل 20% أو 10% قبل الشحن، والأفضل تستنى نوتيفيكشن من الموبايل إنه محتاج يتشحن.
بلاش تشغل ألعاب وحاجات بتستهلك طاقة كتير من البطارية
طبعًا النقطة دي صعبة. معظمنا بيلعب على الموبايل في المواصلات، ده لو ماكانش بيقضي معظم وقته بيلعب بابجي. بس لو قدرت تقلل الألعاب على الموبايل هيكون أحسن علشان ماتستهلكش صحة البطارية بسرعة. وأهم حاجة برضه إنك ماتلعبش أبدًا والبطارية بتشحن، لإنه زيّ ما قلنا ده بيبوظ البطارية بسرعة جدًا.
جربوا نصايح البطارية دي وعرفونا نفعت معاكم ولا لأ؟