من الهيشان والهبوط: ازاي تحافظ على شعرك الكيرلي أثناء النوم

بطبيعتنا، نسبة كبيرة من المصريين شعرهم كيرلي، وطبعًا بنواجه مشكلة كبيرة في الروتين بتاعه علشان نحافظ عليه من الهيشان والتقصف، علشان يبقى شكله صحي وطبيعي، وأكتر وقت بيكون فيه مشكلة ومابنعرفش نحافظ على شعرنا ازاي هو وقت النوم، يعني تبقي مستحمية وعاملة روتين تعبتي فيه قد كده وتنامي تصحي تلاقي حاجة تانية خالص، علشان كده في طرق بتساعد في المحافظة على الكيرلز بشكل حلو في وقت النوم.

مخدة ستان

النصيحة الذهبية الأولى لروتين الشعر الكيرلي في فترة النوم، إنك تربطي شعرك بإيشارب ستان أو تنامي على مخدة ستان، أو حتى تجيبي كيس مخدة من قماش الستان، علشان القماش القطن بيمتص الزيوت الطبيعية من شعرك، وأي منتجات تانية بتعمليها في روتينك، على عكس الستان والحرير، علشان كده الستان هيساعد في الحفاظ على الشعر من التكسير.

تسريحة الأناناسة

كمان بعد ما بقت موضة ومش بنتكسف ننزل بها في الشارع، التسريحة دي هي الحل الأمثل علشان تحافظ على الكيرلز من التكسير، وبتتعمل بطريقة سهلة جدًا، ارفعي شعرك لفوق على شكل الأناناسة، وخلي أطراف شعرك تنزل من قدام، وبعد ما بنعملها، ممكن نربط إيشارب ستان لنتيجة أحسن.

الضفاير

غير إننا متعودين عليها من أمهاتنا من واحنا أطفال، الضفاير حل مناسب للحفاظ على الكيرلز بتموجات مظبوطة وهتحافظ عليه من الهيشان، وممكن لنتيجة أحسن نعمل الضفاير بعد غسل الشعر وعمل الروتين كله والستايلينج.

كحكة عشوائية

عن: هي

لو شعرك أقصر من إنه يتعمل أناناسة، فممكن الكحكة العادية تقضي الغرض، بس نخلي بالنا إنها تكون مفكوكة مش مشدودة علشان ماتبوظش الكيرلز، وممكن تثبتيها بالبنس علشان ماتتفكش بسهولة.

ربط الشعر قبل النوم

من الحاجات اللي بتبوظ الشعر الكيرلي إننا ننام وهو مش ملموم، هنصحى نلاقيه هايش ومتكسر بطريقة تخوف، علشان كده لازم نربطه قبل النوم علشان نحافظ على الكيرلز من التقصف والهيشان، والأفضل تبعدي عن التوك المطاط أو البلاستيك، لإنها بتكسر الشعر.

بما إن التريند دلوقتي إننا نبعد شعرنا عن كل وسائل الفرد غير الطبيعية، وإننا نسيبه لطبيعته سواء مفرود أو مجعد، فده الوقت اللي لازم تهتمي فيه بشعرك الكيرلي حتى وأنتي نايمة، خصوصًا إن المنتجات المناسبة له بقت متوافرة بشكل كبير.

آخر كلمة: ماتفوتوش قراءة: ليه مشوار الكوافير ممكن يبقى أحلى أو أوحش حاجة في يومك؟

تعليقات
Loading...