5 وصفات مغربية سهلة للأكل النباتي

المطبخ المغربي معروف بتنوع واختلاف أكلاته، وده لأنه عامل مزيج بين مطابخ حضارات مختلفة زيّ المطبخ الأمازيجي، والعربي، والأندلسي، ومطبخ الشرق الأوسط، والبحر الأبيض المتوسط، وأفريقيا، وبيعتبر من أقدم المطابخ العريقة، وهو حاصل على المرتبة الأولى في المطابخ العربية، وفي سنة 2012 خد المرتبة التانية بعد فرنسا عالميًا.. ولكن في عصرنا ده ابتدى بعض الناس يتجهوا لنظام الأكل النباتي اللي بيعتمد على إنه ميأكلوش أي نوع من أنواع اللحوم، أو الدواجن، أو الأسماك.. فتعالوا نعرف شوية وصفات نباتية من المطبخ المغربي.

التكتوكة

عن: yabiladi

التكتوكة هي من وصفات المقبلات أو التغميس، وهي سهلة وسريعة التحضير، كل اللي هنحتاجه هو معلقة كبيرة من زيت الزيتون، و3 فصوص توم مفروم، وكوباية ونص مكعبات طماطم، و3 معالق كبيرة من الكزبرة المرومة، وربع معلقة صغيرة من الملح، ونص معلقة صغيرة من الكمون، ومعلقة صغيرة من البابريكا، و3 حبات من الفلفل الأحمر، والأصفر، والبرتقالي.

هنشوي الفلفل في الفرن، ونسيبه يبرد ونقطعه، وعلى جنب هنشوح التوم في الزيت على نار متوسطة لمدة دقيقة، بعد كده هنزود الفلفل والطماطم مع باقي المكونات ونقلبهم، ونسيبها تتسبك، بعد كده نقدمها في الطبق ونرش عليها بقدونس، وتتأكل مع عيش.

طاجين البطاطا

الطاجين من أشهر الأطباق المغربية، في العادي بيتعمل بالفراخ أو اللحمة، ولكن جيبنالكم وصفة نباتية.

هنحتاج 4 حبات بطاطس، وحبة طماطم، وبصلة كبيرة، ونص كوباية بقدونس مفروم، ومعلقة كبيرة من التوم المهروس، وربع معلقة صغيرة من الكمون، وربع معلقة صغيرة من الزنجبيل، ونص معلقة صغيرة من الفلفل الأسود، وربع معلقة صغيرة من الزعفران، وربع معلقة صغيرة من ورق الغار، وربع حبة ليمون، ومعلقتين كبار من زيت الزيتون، وكوبايتين ونص من المياه.

هنقشر ونقطع البطاطس، والطماطم، والبصل، ونسخن زيت الزيتون في صينية متوسطة، ونحط البصل في الصينية مع التوم والزنجبيل ونقلبهم لمدة دقيقتين، ونزود الطماطم والبصل، وبعد حوالي تلات دقايق نزود البطاطس ونقلب، ونزود باقي المكونات، ونسيبها لغاية ما تتطبخ، ونزود المياه من فوق مع التقليب المستمر، ونسيبه ربع ساعة، ولو الصلصة نشفت نزود كوباية مياه، ونطفي عليه ونسيبه يبرد لمدة ربع ساعة قبل التقديم.

شوربة الحريرة

عن: tareekaa

الحريرة من أشهر وأجمل الأطباق في المغرب، وكمان معروفة بطريقة طبخها بلحم الغنم، ولكن معانا وصفة مناسبة للنظام النباتي.

هنحتاج معلقة كبيرة من زيت الزيتون، وتلات معالق كبار بقدونس مفروم وناعم، وتلات معالق كزبرة مفرومة وناعمة، وحبة طماطم مهروسة، و رشة زعفران مطحون، وست كوبايات من المياه، وربع كوباية شعيرية، ونص كوباية عدس مسلوق ومتصفي من المياه، وكوباية حمص، وربع معلقة كمون مطحون، وكوباية مشروم، وأربع حبات بطاطس متقطعة مكعبات، ونص بصلة، ومعلقة كبيرة من صلصة الطماطم.

هنسخن الزيت في حلة على نار متوسطة، ونزود البصل والمشروم، ونقلب كويس لمدة دقيقة، ونزود البقدونس، والكزبرة، والزعفران، والطماطم، وصلصة الطماطم، والمياه، ونخفف النار، ونكمل تقليب لمدة 10 دقايق، ونزود الشعيرية، والعدس، والحمص، والكمون، ونستنى عليها كمان 10 دقايق ونقدمها.

عصير الشمندر

عن: justfood

عصير الشمندر أو البنجر ليه فوايد صحية كتيرة جدًا، فالبنجر بيحتوي على فيتامين “أ”، وفيتامين “س”، وفيتامين “ب”، وحديد، ومغنيسيوم، وبوتاسيوم.

هنحتاج حبتين من الشمندر، وتفاحة خضرا، وتلات حبات من الجزر، ومعلقة كبيرة من حبوب الشيا، وهنقشر كل المكونات، ونضربها في الخلاط كويس، ونزود حبوب الشيا لمدة خمس دقايق علشان تنقع، ونصبها في كوبايات للتقديم.

سلطة الباربا

عن: sofra.cbc

سلطة الباربا كمان مفيدة لاحتوائها على البنجر، وهي من أشهر السلطات والمقبلات المغربية.

هنحتاج ربع كيلو بنجر مسلوق، وربع كيلو طماطم مفرومة من غير بذر، وربع كيلو فاصوليا بيضا مسلوقة، وربع كيلو فاصوليا حمرا، وبصلتين مفرومة، ومعلقتين كبار من الزيتون الأخضر المتقطع، ومكعبات جبنة بيضا حسب الرغبة، وتلات حبات أفوكادو، وعصير نص ليمونة، وملح، وفلفل أسود، ونص معلقة صغيرة من الشطة، ومعلقة كبيرة من البقدونس، ومعلقة خل، ومعلقة كبيرة من المستردة، وربع كوباية زيت، ومعلقة كبيرة من البقدونس، وللتزيين درة وزيتون أسود.

هنخلط البقدونس بالشطة وعصير الليمون، ونزوده للفاصوليا والبنجر ونقلب، ونحطها في التلاجة تبرد، وفي طبق التقديم هنحط الخليط ده ونزود الطماطم، والبصل، والزيتون الأخضر، ومن على الوش هنحط الأفوكادو، ومكعبات الجبنة، ونزين بالدرة، والزيتون، وللصوص هنخلط الخل، والمستردة، والزيت، والفلفل ونزوده فوق الخليط على الوش.

آخر كلمة: ماتفوتوش قراءة: سلطات ومقبلات عربية سهلة علشان تكمل بيها السفرة.

تعليقات
Loading...
Tweet
Share
Share
Pin