5 حاجات هتخليك خفيف في أكل العيد الكبير

طبعًا من وصفنا ليه كمصريين وتسميته من زمان “عيد اللحمة” واضح من الاسم بس الكوارث اللي بتتعمل في الأكل في العيد ده، ومتعودين على طبخ كل ما لذ وطاب من أكلات وطبخات تقيلة ودسمة، لكننا بنستمتع ونحس بيها بوجود العيد خصوصًا مع اللمة سواء مع الأهل أو الصحاب، وكل مرة بعد ارتكاب أي جريمة في الأكل بنرجع نقول ياريتنا ما تقلنا في الأكل كده، لكن في حاجات بسيطة وتريكات لو أخدنا بالنا منها هنتفادى التقل اللي بنحس بيه وهنفضل healthy شوية أو على الأقل خفاف.

الأكل في طبق واحد

عن: mmlakaty

أول ما تقرا الجملة هتحس إنها بديهية، بس قصدنا إن لما ناخد بالنا ونغرف جزء من أنوا الأكل المختلفة على السفرة في طبق واحد، هنعرف احنا أكلنا قد إيه ومش هنزود في الكمية بشكل مفرط، على عكس لو فضلنا متبعين خطة إننا ناكل حتة من كل الأطباق الرئيسية وفاكرين إننا كده بناخد حتة صغيرة وبنلقط، لكننا بناكل بكمية غير محسوبة ومش هتحس بالكارثة اللي بتعملها غير لما تخلص.

وجبة فطار خفيفة قبل العزومة

أغلبنا بيستسهل ويقولك هاكل وجبة تانية ليه؟ ما هناكل كلنا الوليمة اللي على الغدا، لكن ده غلط وبيتسبب في الأكل بعدها بشراهة شديدة، لكن لو فطرنا وجبة خفيفة واتفادينا المجاعة اللي بنعملها في نفسنا دي، هنظبط كميات أكلنا على مدار اليوم كله.

ابعد عن الحلويات

عن: gfx4arab

علشان الحكاية مش ناقصة، خلينا بس في تقل الأكلات نفسها، ونبعد عن الحلويات الدسمة خصوصًا الحلويات الشرقية، أو على الأقل ناكل حتة صغيرة.

الاهتمام بالسلطة

وسط الكوارث اللي بنعملها باللحوم والسمنة والصلصة، طبق سلطة جنب كل ده هيرطب ويفرق كتير بطريقة ماتتخيلهاش، وهيعمل توازن في القيمة الغذائية للوجبات كمان وهيساعد في عملية الهضم.

شرب المياه بدل العصائر والمشروبات الغازية

علشان كوباية عصير أو بيبسي فيها كمية سعرات حرارية ماتتخيلهاش، اشرب مياه بدل العصائر والمشروبات الغازية علشان تحافظ على جسمك وكمان تسهل عملية الهضم كمان بأقل سعرات حرارية ممكنة.

آخر كلمة: ماتفوتوش قراءة: 5 أكلات ممكن تتاكل بدل اللحمة، وبرضه تحس بالعيد

تعليقات
Loading...
Tweet
Share
Share
Pin