علاقة الأهل بأبنائهم من أهم العلاقات اللي بتساهم بشكل كبير في تأسيس شخصيتهم وبتأثر بالتباعية على علاقتهم بنفسهم وبالآخرين. وعلاقة الأهل مش المفروض إنها تقتصر على إعطاء الأوامر والتربية على الصح والغلط، لكن مهم كمان يكون في رابط عاطفي وحوار بيجمعهم، لإن العلاقة القاسية والجافة بين الآباء والأبناء بتتسبب في مشاكل أكبر بكتير من اللي ممكن نتخيلها، قد تصل أحيانًا للانتحار، زى قصة الشاب اللي هنتكلم عنه انهرده، واللي انتحر بسبب علاقته السيئة بوالده.
انتشلت السلطات المصرية جثة الشاب محمد رزق عنده 17 سنة، انتحر بإلقاء نفسه في النيل بمدينة فارسكور التابعة لمحافظة دمياط شمالي البلاد. وقال شاب كان متواجد في المكان لموقع “سكاي نيوز عربية” إن أحد الصيادين شاف الشاب وهو بينط في الماء، وحاول اللحاق به لكن مقدرش، وبعدها بلغ السلطات اللي أرسلت فرق الإنقاذ النهري بحثا عنه. والجزء المأساوي في القصة مش بيقف هنا، لكن كمان لما ساب الشاب ده 4 رسائل وراه علشان يكونوا آخر كلماته للناس.
على حسابه الخاص بالسوشيال ميديا، كتب محمد رزق إنه هيقدم على الانتحار بسبب مشاكله مع أبوه. وعلشان كدة كانت أول رسالة يوجهها للأهل اللي وصاهم إنهم ياخدوا بالهم من أولادهم ويهتموا بصحتهم النفسية لإنه كان بينام يوميًا حزين بسبب مشاكله مع والده. أما الرسالة التانية كانت للأزواج انهم دايمًا يظهروا الدعم لأولادهم وميحسسهومش إنهم لوحدهم لإنه بيكون إحساس قاسي. أما الرسالة الثانية والثالثة فكانوا خاصين بأفراد عيلته فوصى أعمامه بالاهتمام بوالدته والرسالة الأخيرة كانت خاصة بالإنسانة اللي مرتبط بيها، كان بيعتذرلها إنه مقدرش يوفى بوعوده لها وأظهرلها حبه.
خسارة أفراد من مجتمعنا بتكون خسارة كبيرة، وإقدام بعض الشباب اللي في بداية حياتهم بسبب مشاكل اجتماعية زى العلاقة بالأهل، بيفرض علينا فتح الملف ده، لإنه مهم. بغض النظر عن الواقعة دي وسبب الخلافات اللي ممكن يكون حصل، لازم على الأهل في العموم إنهم يراجعوا علاقتهم بأولادهم ونوع الحوار اللي بيدور مبينهم. هل هو عنيف و one sided؟ هل العلاقة قائمة على مجرد إعطاء الأوامر، دون النظر للجوانب الأخرى المهمة للعلاقة؟
الأهل مش مجرد أفراد بيوفروا أكل وشرب وبيعلموا أولادهم الصح والغلط. لكن لازم يكونوا قبل أى شيء أصدقاء لأولادهم وملاذ آمن يقدروا يلجأوا له وقت الشدة، مش يكونوا هما السبب إن أولادهم يشوفوا إن مفيش مخرج لمشاكلهم معاهم غير إنهاء حياتهم. ولعل القصة دي تكون wake up call للأهالي إنهم ينظروا لعلاقاتهم بأبنائهم بشكل تاني..