زىّ ما كان في خناقات ودراما كتير في الأعمال الفنية اللي بنتفرج عليها في السباق الرمضاني ده، كان في كمان بعض اللقطات السعيدة اللي شوفناها وحضرناها، والجدير بالذكر إننا حضرنا أفراح كتير جدًا السنة دي، من أفراح شعبية لأفراح أُقيمت في أفخم الفنادق. ولفت نظرنا تصاميم الفساتين المتنوعة والمختلفة اللي شوفناهم على الشاشة، علشان كده جمعنالكم كل فساتين الأفراح اللي اتفرجنا عليها في السباق الرمضاني 2021، واختاروا منهم أكتر فستان زفاف مميز بالنسبة لكم.
مسلسل لحم غزال
فستان من تصميم مصمم الأزياء هاني البحيري ارتدته غادة عبدالرازق ضمن أحداث مسلسل لحم غزال، وكملت الإطلالة بتسريحة شعر مرفوعة ومجوهرات من Mawla Diamonds.
مسلسل جوري
في المسلسل البوليسي العراقي جوري، شوفنا هبة نور في فستان رقيق ومميز بقصة ناعمة من بيت أزياء سعيد قبيسي، ومجوهرات عماد بعدراني.
مسلسل اللي مالوش كبير
رغم إن الثنائي ماعملوش فرح وقت زواجهم في الحقيقة، لكن جاتلهم الفرصة من تاني ضمن سياق أحداث مسلسل اللي مالوش كبير والفستان كان من تصميم هاني البحيري، واعتمد على التطريز اليدوي للورود على التُل علشان يدي للفستان بُعد أنثوي.
مسلسل لعبة نيوتن
فستان منى زكي في مسلسل لعبة نيوتن كان غير تقليدي بالنسبة لبقية الفساتين اللي شوفناها. الفستان كان من تصميم مصمم الأزياء محمد سامي اللي قال إن الفستان أخد منه شهر لتنفيذه، صممه بقماش ليكرا، والطرحة من الدانتيل شانتيلي فرنسي.
مسلسل ضد الكسر
خلال أحداث المسلسل، لبست تارا عماد فستان رقيق ومنفوش أظهر جمالها وكان متناسب مع زوقها بشكل عام في الإطلالات اللي هى بتختارها.
مسلسل الاختيار 2
بعد طول انتظار لفرح يحيي وعليا في المسلسل، أخيرًا شوفنا أسماء أبو اليزيد في الفستان الأبيض اللي تميز بالرقي والبساطة وكان من تصميم سامو هجرس.
مسلسل أمينة حاف
في المسلسل الكويتي أمينة حاف، شوفنا شوق الهادي في فستان اتكلم الكل عنه لنعومته وبساطته اللي أبرز جمالها من تصميم إلهام معرفي.
مسلسل موسى
في مسلسل موسى شوفنا فستانين فرح، والاتنين كانوا مختلفين عن بعض تمامًا. فشوفنا سمية الخشاب في فستان mermaid cut وأكمام طويلة، مع طرحة من نفس القماش المستخدم في الفستان.
أما هبة مجدي فاعتمدت إطلالة أكثر كلاسيكية من حيث قصة الفستان والقماش المستخدم، من تصميم أزياء فساتين بوتيك، بالإضافة للمجوهرات والاكسسوارات اللي كملت اللوك.
مسلسل ضل راجل
فستان زفاف مميز تاني شوفناه على هدى الإتربي في مسلسل ضل راجل، من تصميم سماح مهران، ستايليست سعيد رمزي، ومجوهرات جلامور.
مسلسل مارغريت
بالنسبة لنور الشيخ في مسلسلها الكويتي مارغريت، شوفناها في فستان زفاف مختلف وجديد، تم تصميمه من الدانتيل، بقصته العلوية الشبيهه بسترة من الشيفون، مزينة بتطريزات الدانتيل ياقتها المميزة.
مسلسل كله بالحب
ظهرت صابرين في مسلسل كله بالحب بفستان فرح من تصميم هاني البحيري مُرصع بالورود ومنسدل بأكمام طويلة، علشان يدي إطلالة ناعمة وبسيطة.
مسلسل بنت السلطان
أما في مسلسل بنت السلطان، شوفنا روجينا في فستان من تصميم سامو هجرس اعتمد فيه على إطلالة شيك وفستان منفوش.