10 مسلسلات بنحس إنها جزء مننا ومش بنزهق من مشاهدتها

في نوع كده من المسلسلات، مش شرط قديم أو جديد، لكن بنحس واحنا بنشوفه إنه جزء مننا كده، أو إنه comfort zone، مهما شوفناه مش بنزهق منه، مهما عدى عليه وقت وشوفنا أعمال فنية غيره، هيفضل له مكانته الخاصة عندنا. ولما بنشوفه بنحس إننا شايفين فيه شخصيات حقيقية، شايفين فيهم نفسنا وناس حقيقية حولينا، هتلاقي شخصيات منهم يشبهوا أهلك وأصحابك، حتى العلاقات بين الشخصيات في المسلسل هتلاقيها تشبه علاقتك باللي حوليك، ويمكن ده اللي بيخلق ألفة بينك وبين المسلسل وأبطاله، وبيخليك تحس إنه جزء مهم في حياتك بتحب ترجع له من وقت للتاني، والنوع ده من المسلسلات اللي متعلقين بيها كتير، هنقول شوية منهم في المقال ده.

ليالي الحلمية

مهما عدى وقت، هيفضل المسلسل ده في قائمة المسلسلات المفضلة لأغلب المصريين، من كذا جيل، وله حالة خاصة كده حتى وقت مشاهدته، أبطاله قدروا بكل سلاسة يدخلوا قلوب المشاهدين ويأثروا فيهم، ويحفروا العمل الفني ده في ذهن الجمهور، بأجزاء وأحداث كتير مختلفة. وأشهرهم مشاهد العمدة سليمان غانم والباشا سليم البدري، اللي ولا مرة فشلوا يضحكونا.

لن أعيش في جلباب أبي

لحد دلوقتي، كل ما الناس تلاقيه على أي قناة على التليفزيون يقولوا لبعض، ونشوف على السوشيال ميديا كمية ميمز من المسلسل، وطبعًا الحلقة اللي الناس بتفكر بعض بيها، ملحمة فرح سنية، كل دي حاجات بتخلي المسلسل لسه عايش في مجتمعنا ولحد دلوقتي الناس بتضرب المثل بقصة حب “عبده وفاطنة” اللي ابتدت على عربية الكشري في الوكالة. الضحك والهزار ده كله مايمنعش وجود أبعاد كتير في المسلسل، وحبكة درامية وشخصيات بتعقيدات مختلفة وأفكار مختلفة بتتعرض وتتناقش على التليفزيون وتتقدم للمجتمع بشكل سهل.

حديث الصباح والمساء

فكرة الحياة بشكل في منتهى البساطة بيتقدم للمشاهدين بخطوط درامية فيها نوع من الفلسفة، والجميل إنه ممزوج بشكل درامي اجتماعي يخلّي المسلسل فعلًا عايش لفترات مختلفة، أجيال تتولد وأجيال تموت، والحياة بأشكالها وبطبقات المجتمع المختلفة، بشخصيات كتير قدرت تقدم عمل فني قوي. سلسلة اتناقشت بسلاسة ومن غير تعقيد، مع إن الفكرة الأساسية فلسفية بحتة.

سابع جار

زيّ ما قولنا، مش بيفرق المسلسل يكون قديم ولا جديد، وسابع جار من أكتر المسلسلات اللي عرفت تبقى comfort zone المشاهدين، ومهما نشوفه مابنزهقش، معظم العلاقات بين الشخصيات فيه قريبة جدًا لينا، وشبهنا، يمكن ده اللي ساعد في نجاحه بشكل كبير جدًا في مجتمعنا، لدرجة إن الناس بتقول مستحيل تتفرج عليه وماتحسش إن ليلى ولميا هما مامتك وخالتك فعلًا.

ريا وسكينة

غريب إن مسلسل جريمة يكون من الحاجات المفضلة لينا صح؟ علشان هو مش بس مسلسل بيحكي عن جرائم وقصص من زمن، هو حالة كاملة من شخصيات وأبعادها، وزمن مختلف بنشوفه بيتجسد على الشاشة بواقعية ودراما وكمان كوميديا، الشخصيات والأبطال قدروا يعملوا مسلسل مش بس يحكي عن قصة حقيقية، لكن كمان يفضل في ذهن المشاهدين ومهما يتعرض يتفرجوا عليه كإنها أول مرة.

الحقيقة والسراب

طبعًا وأنت بتقرا الاسم جه في بالك كمية ميمز مالهاش آخر، المسلسل قدر بطريقة غريبة يعلق مع المشاهدين ويشوفوه مليون مرة من غير زهق، رغم إن الشخصيات والأحداث مش كتير، وتقدر بكل سهولة تتوقع مسار الأحداث، لكن مش بنبطل نتفرج عليه ولا بنبطل نعمل ميمز عليه.

عائلة الحاج متولي

عن: aabbir

مع إن لما كبرنا اكتشفنا إنها عيلة توكسيك، بس برضه المسلسل ده واحد من أكتر المسلسلات اللي بيحتل مركز في قائمة المسلسلات المفضلة للمصريين، بأحداثه اللي خلاص حفظناها.

زيزينيا

في الأسكندرية، حكايات كتير بشخصيات بتمثل طبقات مختلفة من المجتمع في زمن تاني، والحكايات دي قدرت تشد انتباه وقلب المشاهدين لإنهم يتعلقوا بالمسلسل وشخصياته.

الضوء الشارد

من ضمن مسلسلات كتير اتعملت في الوقت ده عن الصعيد، لكن الضوء الشارد تعتبر واحدة من أكتر المسلسلات دي اللي قدرت تحجز لنفسها مكان في عقول المشاهدين وفي تاريخ الدراما المصرية، بشكل سهل وجذاب.

نصيبي وقسمتك

رغم إن لحد النهارده بنشوف أجزاء جديدة منه بحكايات وقصص مختلفة، لكن المسلسل من أول جزء له قدر يحقق نجاح ويخلي الجمهور يشوفه مرة واتنين وعشرة، وقدر بطريقته في اختلاف الحكايات والشخصيات، يقدم أكتر من نموذج وأكتر من قضية، هتحب إنك تتابعهم.

آخر كلمة: تترات المسلسلات وأغانيها أكيد سبب أساسي في حبنا ليها وفي نجاحها كمان.. علشان كده، ماتفوتوش قراءة: من مدحت صالح لشيرين، دول المطربين اللي خلونا نحب تترات المسلسلات

تعليقات
Loading...
Tweet
Share
Share
Pin