في بديهيات اتربينا عليها وعلى حبها، ومش بنسمح لأي حد إنه يلعب فيها أو ييجي يقولنا إيه اللي بتعملوه ده أو بتحبوها ليه، وبنعتبر ده تعدي على كينونتنا وتكسير في معتقداتنا، وبنستغرب أوي لو لقينا ناس مش متفقة أو مش بتحب نفس الحاجات اللي بنحبها مع إن الاختلاف شيء طبيعي بس احنا مش بنتقبله في الحتت دي. ودي قائمة بشوية حاجات بنحبها ومش بنقبل فيها أي نقاش.
إنك تنزل البحر
الشائع إن الناس بتستنى الصيف بفارغ الصبر علشان تاخد إجازتها وتسافر في أي حتة وتنزل وتبلبط في المياه بالساعات من غير ما تزهق، حب مش مفهوم ومش عارفين بدأ منين بالظبط، بس على النقيض التاني في فئة بتفضل تستمتع بالبحر بشكل تاني بإنها تقعد وتسرح مع البحر وتفضل بصاله بالساعات من غير حتى ما تدلدل رجليها في المياه، ومش عارفين هل هما كده بيعرفوا يستمتعوا فعلًا ولا لأ.
إنك تستمتع بأكل البطيخ والمانجا
من الفاكهة اللي بنستنى من سنة لسنة علشانها، وبنحب ناكلها في كل أوضاعها وهما معمولين عصاير أو ناكلهم وهما لسه برونقهم وهيبتهم، أو ندخلهم ضمن أكلات تانية زيّ الكنافة بالمانجا أو سلطة البطيخ، بس في عالم موازي، في فئة بترفضهم بدون ما تدي أي أسباب واضحة، زيّ إنهم مش بيعرفوا ياكلوهم من غير ما هيبتهم تروح، وده طبعًا بعيدًا عن الناس اللي عندها مشاكل صحية أو حساسية من شيء معين.
تفهم إن اللهجة البريطاني أشيك
ناس كتير بتفضل اللهجة البريطاني وبيحسوا إنها شيك وقيمة في نفسها ولغة ملوك بقى، والشخص فيها بيتكلم بسرعة وبينجز في الوقت، وتحس إنه مستعجل كده فبياكل الكلام وبيتكلم من جوا أوي، على عكس الأمريكاني بيحسوا إن الحروف مفخمة وكل حرف بيتنطق.
إنك تقدر الشوكولاتة
مسبب أساسي من مسبباب السعادة بشهادة الأبحاث لإن فيها مادة التريبتوفان اللي بتساعد الدماغ إنها تفرز هرمون السيروتونين، واللي بيعتبر الناقل العصبي المسؤول عن شعورنا بالسعادة، ومادة الفينيثيلامين اللي بتشتغل كمادة مضادة للاكتئاب، فمفيش أي مبرر لعدم حبك ليها غير إنك مانع الفرحة تخش قلبك وهادم اللحظات المفرحة.
إنك تستنى يوم عيد ميلادك
بنحب نعمل مفاجأت للناس يوم عيد ميلادهم، باعتباره يوم يستحق الاحتفال به وبداية أمل وأمنيات جديدة وأحلام نفسهم يحققوها، وبيقعدوا يكتبوا مع بداية أول يوم في سنتهم الجديدة حاجات نفسهم يعملواها أو يجربوها أو قررات عايزين ياخدوها، بس في ناس تانية مش بتحب تحتفل باليوم ده أصلًا، وبعتبره يوم زيّ أي يوم عادي وبتتعمد تخبي تاريخ ميلادها على أصحابها علشان ماحدش يفكر يعملها احتفال، وفي الغالب الإحساس ده بيبقى مربوط بإن أنا كبرت وبيعتبروه إنذار لحاجات كتير في حياتهم.
إنك تحب المطر
الناس بتستنى الشتاء علشان تستمتع بالمطر وبريحته وهو مغرق الشوارع ومخلي ريحة الجو بعدها فيها دفء وسكون، بيعتبروه خير وأوقات كتير بيبقى هو البطل في الأفلام والمسلسلات. في بقى فئة من الناس بتخاف منه وكإنه خطر هيقضي على البشرية، ومبرراتهم إن الشوارع بتقلب زحلقة وطينة وبتجري على الغسيل اللي لسه ناشراه.
حب الست “أم كلثوم”
سوما صاحبة الحنجرة الذهبية والصوت القوي اللي مابيتهزش، شخصية أثرت قلوب الجماهير في الوطن العربي كله، وحفلاتها الناس كانت بتحضرها من أخر الدنيا، واللي ماكنش بيحضر كان بيستناها على الراديو علشان يتسلطن، وكون إنك ممكن تلاقي حد مش بيحبها فده بنعتبره عميل مزدوج عادي جدًا.