الفنانة ياسمين عبد العزيز لسه في مرحلة العلاج بعد الأزمة الصحية اللي دخلت فيها الفترة الأخيرة. وحاليًا ياسمين في جينيف، سويسرا علشان تكمل علاجها.
نزل الفنان وائل عبد العزيز، أخو ياسمين، بوست على صفحته على الإنستجرام وحط فيه صورة مرسومة ليها وكتب على البوست “هانت يا روحي هانت ❤.”
ومن أسبوع، يوم التلات 10 أغسطس 2021، سافرت ياسمين في طيارة مجهزة طبيًا، علشان تكمل مرحلة علاجها في سويسرا، بعد ما وصلت في سيارة إسعاف مجهزة للصالة 4 في مطار القاهرة.
ليه أحمد العوضي ماسافرش جينيف مع ياسمين عبد العزيز؟
ما حدث من تسيب واهمال وتخاذل وتراخي في حالة ياسمين سوف اتحدث عنه لاحقا عقب التعافي التام لياسمين وتعدي الازمه الصحيه…
Posted by أحمد العوضي – Ahmed Elawady on Wednesday, August 11, 2021
في بوست على صفحته على الإنستجرام كتب الفنان أحمد العوضي، زوج ياسمين، “ما حدث من تسيب وإهمال وتخاذل وتراخي في حالة ياسمين سوف اتحدث عنه لاحقًا عقب التعافي التام لياسمين وتعدي الأزمه الصحيه علي خير إن شاء الله .. والقانون المصري سيحكم بيني وبين المتسبب فيما حدث.. لا تظنن صمتي نسيان.. بل لكل حدث حديث 
.”
وعن أسباب عدم سفره لجنيف مع ياسمين، قال العوضي في تصريحات صحفية: “ماسافرتش مع ياسمين لمدينة جينيف في سويسرا، لإنه ماقدرتش اخد الفيزا في الوقت المناسب”.
وقال العوضي: “الوقت كان ضيق وياسمين كانت محتاجة تطمن على حالتها مع الدكاترة برا مصر، وده بسبب الخطأ الطبي اللي حصل هنا”.
وصرح النجم أحمد العوضي لصدى البلد إنه حاليًا بيجهز أوراق سفره لمدينة جينيف في سويسرا علشان يكون مع زوجته.
بداية أزمة ياسمين الصحية في مصر
يوم 11 يوليو اللي فات دخلت ياسمين عبد العزيز المستشفى علشان تعمل عملية “تكيس المبايض”، خصوصًا إنها كانت بتعاني من وجود أكياس دهنية على المبيضين. حصل خطأ طبي في العملية اتسبب في مشاكل صحية لياسمين زيّ ارتفاع النبض ونقص الأكسجين فى الدم.
قضت ياسمين عبد العزيز 10 أيام في غرفة العناية المركزة واتنقلت بعدها لغرفة عادية في المستشفى لحد ما بدأت حالتها تستقر وسابت المستشفى يوم 6 أغسطس الصبح.
وفضلت أخبار حالتها الصحية مركز اهتمام السوشيال ميديا والإعلام والفنانين طول الفترة اللي فاتت. كل زملائها من الفنانين وكمان المعجبين بتوعها كانوا قلقانين عليها وبيدعوا لها طول الوقت.