دايمًا في الوسط الفني، بيبقى في فنانين وفنانات عليهم الضوء بشكل مستمر وأي حاجة يقولوها أو يعملوها بتُلاحظ على طول وبتُقابل يا إما بهجوم ودفاع من البعض، أو بسيول من الميمز.. ومن الفنانات اللي كل كلمة أو حتى outfit بتلبسه بيحصل حواليه كلام، هي الفنانة ياسمين صبري اللي اتصدرت التريند أكتر من مرة بسبب حاجات مختلفة، ممكن تكون أخطاء غير مقصودة في الكلام أو حتى حاجات هي فعلًا مالهاش دخل بيها، بس الناس مش بتعدي أي حاجة يسمعوها بالساهل.. فبعد ما أثارت الجدل بالكلام اللي قالته عن الكورونا في مهرجان الجونة السينمائي، وسعر الشنطة بتاعتها اللي الناس شافته مبالغ فيه وربطت الموضوع “بسيدة المطر“.. ياسمين صبري بتتصدر التريندات من تاني بسبب كلام قالته في حوار تلفزيوني قديم.
خلال الحوار كانت بتتكلم ياسمين عن إن إزاي الذوق العام عند البنات انحدر وإن هي شايفة إن من واجبها بما إن الضوء عليها بحكم مهنتها، إنها تساعد بالارتقاء بالذوق العام، وقالت إن في كتير من البنات بيحسوا إن الممثلين بس هما اللي عندهم فرصة يلبسوا كويس لإن الفساتين بتبقى غالية جدًا، ولكن أكدت ياسمين إن ده مش صحيح بدليل إن الفستان اللي هى كانت لابساه في الحلقة بـ 2500 جنيه بس و”إن أي بنت تقدر تشتريه”، ومن بعد الجملة دي طلعت كل الميمز.
بس زيّ كمان ما حصل سخرية من الفيديو، كان في دفاع من بعض الناس عن ياسمين وعن اللي قالته، وقالوا إن الفستان فعلًا تمنوا مش غالي بالنسبة لأسعار فساتين السواريه دلوقتي، وإن الهجوم المستمر بداعي وبدون داعي على أي حاجة ياسمين صبري بتقولها غير مبرر أو منطقي لإن مش ذنبها إنها ممثلة وإن هي عندها إمكانيات مادية مخلياها قادرة تعيش حياة كريمة أو حتى مرفهة بالنسبة للبعض.