الدنيا كلها اتقلبت إمبارح على اللي حصل وقت توزيع جوائز الأوسكار؛ ممثل كوميدي معروف اسمه “كريس روك” بيقول نكت على المسرح وبيوزع الجوائز وكان عايز يعمل لقطة على المسرح، وعلق على طريقة قصة شعر زوجة “ويل سميث”، وقال إنها المفروض تنضم للجيش الأمريكي وتخش فرقة خاصة بقصة شعرها، ويل سميث بعد الكلمتين دول قام وضربه على الهوا. بغض النظر عن إنه اعتذر عن اللي عمله وإن فيه كلام إن الجايزة ممكن تتسحب منه، قلم ويل سميث هو اللي عمل قلق على السوشيال ميديا، وانقسمت الأراء حول إن اللي عمله صح وتصرف طبيعي ولا غلط ومافيش مبرر للعنف؟
الأراء اللي ضد بتقول إنه كان ممكن بشياكة يطلع ويقول له إن ده بسبب المرض اللي عندها وإن المرض ده كان بسبب أزمة نفسية، وإنه فخور بها وبقوتها وشجاعتها، وبعدها ينسحب من الحفلة بهدوء، وبكده يبقى قلب الموقف لصالحه 100%، وكمان كسب تعاطف الجمهور معه وخرج من الموقف وهو كسبان احترامهم وكسبان الجايزة. وقالوا إن ماكنش في داعي أبدًا للعنف، وكان ممكن يرد الكلام بكلام مش يرد بضرب.
في ناس حللت اللي حصل بشكل أعمق وقالت إن الموضوع له شق أبعد من مجرد رد فعل لحظي، وإن اللي حصل ده بيُشير لمصطلح “الذكورة السامة” واللي بتدعم العنف تحت بند حماية الست؛ زيّ أنا هتخانق لها في الشارع واضرب لها ناس لو حد ضايقها. وفي الحالة دي، طالما هو مش هينفع يتحكم في انفعالاته، فاهيضرب لها الناس النهارده ويدافع عنها، وبكرا هيضربها بحجة إنه خايف عليها وإنه غيران عليها وكله هيبقى تحت بند حمايتها.
والرأي التاني كان مع اللي عمله سميث واعتبروه تصرف طبيعي من راجل بيخاف على مراته، وإن دي مش نكتة ده تطاول، وإنه بالتصرف ده كان بيحاول إنه يحميها من أي أذى نفسي، ودي نتيجة طبيعية للتنمر اللي اتعرضت له مراته. وقالوا كمان إن هو كده راجل وبيحقق لها الأمان اللي أي ست بتدور عليه، وده تعبير عن الحب.
احنا مانقدرش نحكم على اللي حصل أو نقول ده صح 100% أو ده غلط 100%، مانعرفش فعلًا حجم الأذى النفسي اللي ممكن يكون وقع عليهم بسبب اللي قالوا عليها “نكتة” بس هي تنمر، ومانعرفش هل رد الفعل ده كان نتيجة لتراكمات وضغط نفسي كبير فطلع بشكل عنيف كده، ولا هو فعلًا كان قاصد يلجأ للعنف وإن هي دي الوسيلة الأسهل بالنسبة له.
بغض النظر على اللي حصل وبعيدًا عن الموضوع، أنتم شايفين التصرف ده، من وجهة نظركم، بيعبر عن مفهوم الرجولة، ولا في أزمة حقيقية لو الشخص اللي معاك مش عارف يتحكم في انفعالاته ويتحكم في غضبه اللي ممكن يقوده لتصرفات أسوأ؟ وهل في فرق بين واجب الراجل إنه يعرف يحمي أهل بيته وبين ازاي يحميهم بعيدًا عن أي عنف، لإنه ممكن يتقلب العنف ده عليهم هما ويتم استخدامه بشكل تاني؟ وهل ده مجرد تعبير مشوه عن مفهوم الحب؟ أنتم شايفين إيه؟