مش مصدق الجملة اللي قريتها في العنوان؟ احنا كمان لما شوفنا إعلان اتفاجئنا فيه واحنا سامعين موسيقى عمر خيرت وبعدها بظهور ويجز على مسرح، وسمعناه بيغني جملة بسيطة لكنه بيتحدى نفسه فيها وبيسابق نفسه، وفعلًا الجملة دي بتعبر عن خطواته الفترة اللي فاتت.
“ويجز يغني على أنغام عمر خيرت ” الجملة دي تعتبر حاجة شبه أحلام العصر بالنسبة لجيلنا، اللي كتير كانوا لوقت قريب مش مصدقين فيه وبيقللوا منه ومن منافسته، لكن ويجز دلوقتي بيثبت بطرق كتير إن جيلنا بينافس بشكل لا يمكن تتخيله، وفي الأول بينافس نفسه.
وقبل الغناء على ألحان عمر خيرت، ويجز حقق خطوات كبيرة في مسيرته في الفترة الأخيرة، منهم غنائه مع مغني الراب الأمريكي ترافيس سكوت في حفلة في أبو ظبي، وغنائه مع أنغام على مسرح واحد في حفلها (صوت مصر) في السعودية.
ومش هننسى مشاركته بأغنية (عز العرب) في نهائي كأس العالم 2022 في قطر، وكمان إنه تصدر قائمة الأعمال الأكثر استماعًا على (سبوتيفاي) في منطقة الشرق الأوسط لسنة 2022، بأغنية (البخت)، اللي لحد دلوقتي حققت مئات الملايين من الاستماع والمشاهدة على مواقع مختلفة.
تفتكروا أحلام جيلنا ممكن توصل لإيه؟