من أول حلقتين في مسلسل (الكبير) اختلفت آراء الناس عنه، بالرغم من إن ناس كتير كانت مستنية المسلسل في رمضان ومتحمسين للجديد اللي هيقدموه نجومهم المفضلين، لكن الجدال اللي انتشر على السوشيال ميديا مع أول حلقتين كان كبير، ووصل لاتهامات بوجود لجان إلكترونية بتحارب الممثلة رحمة أحمد، اللي قدمت دور مربوحة، وحققت فيه نجاح كبير في الموسم اللي فات.
بعض الناس قالت إن مربوحة مابقتش بتضحك، وإن الشخصية لم تتطور بالشكل الكافي في السياق الدرامي وبتعتمد على إفيهات وقلشات محروقة لها من الموسم اللي فات، والبعض كمان قال إنهم بيضطروا يستحملوا المشاهد اللي بتظهر فيها علشان بس التجمع العائلي وبيعملوا نفسهم بيضحكوا، علشان مايبوظوش اللحظة اللي بتتجمع فيها العيلة على سفرة رمضان وبيتفرجوا على مسلسل الكبير زي ما اتعودوا.
الحقيقة ناس كتير شاركت آراء من النوع ده على مستوى واسع، سواء آراء شخصية أو كمان على صفحات بتقدم محتوى فني على الفيسبوك، وناس كتير بتؤيد الرأي اللي بيقول إن لحد دلوقتي شخصية مربوحة مش بتضحك وبتبتذل الكوميديا.
لكن مع ظهور الموجة دي، ظهرت كمان موجة دعم للفنانة رحمة أحمد ولشخصية مربوحة، وكمان فنانين كتير دعموها، ومنهم اللي قال إن موجة الهجوم دي سببها لجان إلكترونية بتشوه صورة الفنانة وبتهاجمها من مجرد عرض حلقتين فقط، وإن موجة الهجوم الكبيرة المفاجئة دي غير طبيعية، خصوصًا إن الناس أشادت بدور مربوحة السنة اللي فاتت.
وناس قالت إن حتى لو لحد دلوقتي ماشوفناش جديد من شخصية مربوحة، الحكم على المسلسل وعلى الشخصية من حلقتين فقط يعتبر حكم سريع وهيكون غير عادل.
جدير بالذكر، إن الفنانة رحمة أحمد ظهرت في تصريحات قبل بداية عرض المسلسل وعبرت عن قلقها الشديد من رد فعل الجمهور، لإن سقف توقعاتهم عن الشخصية عالي، وإن الجزء السابع من المسلسل يعتبر تحدي كبير بالنسبة لها.