وفاة محمد محب بعد تدهور حالته الصحية بسبب هجوم كلب بيتبول

توفى النهارده الشاب المصري محمد محب الماوي بعد تعرضه للعض من كلب تملكه مذيعة مشهورة، داخل مجمع سكني في منطقة الشيخ زايد، والواقعة تحولت لقضية رأي عام وأثارت حالة كبيرة من الجدل في شهر مارس اللي فات.

محمد محب، المدير بأحد البنوك، دخل المستشفى من أكتر من شهر لتلقي العلاج بعد تعرضه لهجوم الكلب، اللي اتسبب في دخوله لغيبوبة، من وقتها وتدهورت حالته الصحية، والنهارده فارق الحياة.

وعن تفاصيل الواقعة، زوجته إيمان عبد المحسن، اتكلمت قبل كده في مداخلة لبرنامج الحكاية مع الإعلامي عمرو أديب، وقالت إن زوجها كان راجع من الشغل ومعاه طلبات للمنزل، وتوجه للشقة الموجود بها الكلب علشان يطلب منهم ربط الكلب، وقالت: “أول ما زوجي خبط على الشقة وفتحوا الباب الكلب هجم عليه وعضه، وابني حاول يساعد والده عشان يبعد الكلب عنه لكن ماعرفش”.

وبعد نقله للمستشفى، محب كان محتاج عملية نقل أعصاب من القدم للذراع اللي تم تمزيقه، لكن بعد إجراء الفحص الطبي المطلوب، دخل محمد غرفة العمليات وبعد ما أخد حقنة التخدير توقف قلبه لمدة ٣٠ دقيقة تقريبًا ودخل فى غيبوبة، وأخد صدمات للقلب واتنقل للرعاية المركزة، وللأسف تدهورت حالته.

آخر كلمة: ماتفوتوش قراءة: تربية الكلاب: بين حظر البيتبول في مصر والسيطرة على الكلاب

تعليقات
Loading...