من خلال صفحته علي الفيسبوك أعلن الفنان حسن الرداد، زوج ايمي سمير غانم، عن وفاة حماته الفنانة دلال عبد العزيز عن عمر يناهز 61 سنة.
كتب حسن الرداد في البوست اللي نزله علي صفحته علي الفيسبوك: “والله ما قادر أكتب ولا مصدق. توفيت إلى رحمة الله تعالي حماتي وأمي الغالية الفنانة الكبيرة، دلال عبد العزيز، أطيب خلق الله”.
وكمل الرداد البوست بتاعه: “عمري ما شوفت منك غير كل خير يا حبيبتي، ربنا يغفرلك ويجمعنا مع بعض في الآخرة، وعايز أقولك إنك هتلاقي مفاجآت حلوة مستنياكي، هتلاقي حبيب عمرك اللي طول الوقت بتسألي عليه”.
وكانت أخر معلومات بتوصلنا عن دلال عبد العزيز في الأيام الأخيرة بتقول إنها في حالة صحية سيئة جدًا، وان الدكاترة كانوا شايفين إنها محتاجة عملية زرع رئة ضروري، لأن رئتها بقت مش قادرة تقوم بوظائفها الحيوية.
وكان زوجها الفنان سمير غانم توفي بسبب مضاعفات الكورونا عن عمر 84 سنة، وكل الأخبار اللي وصلتنا من بعد وفاته بتفيد إن مراته الفنانة دلال عبد العزيز مكانتش تعرف بخبر موته.
والفنان عمرو سعد كان زارها في المستشفي قبل موتها بأيام وقال: “هي متعرفش موضوع أستاذ سمير الله يرحمه، ولما كلمتني كانت بتتكلم بصعوبة جدًا وكانت بتنهج جامد، لكن على الأقل حسيت إنها ابتدت تتحسن نوعا ما”.