الغواصة الهندية اللي كانت مكلفة بالبحث عن قارب الموت في لبنان انتهت مهمتها امبارح بعد ما لقيت حطام القارب ورفات جثث ماتقلش عن عشر أشخاص، بس الرفات دي فضلت موجودة في قاع البحر علشان محتاجين معدات أكبر يقدروا يسحبوا بها القارب.. إيه القصة من أولها؟
بتاريخ السبت 23 أبريل 2022 غرق قارب فيه العشرات من اللبنانيين والسوريين والفسلطينيين في البحر الأبيض المتوسط كانوا مهاجرين لإيطاليا يدوروا على بقايا أحلامهم، ودفعهم اليأس والفقر والبطالة إنهم يشوفوا حياة أفضل. بعد غرق القارب في اليوم ده، انتشلوا عشر جثث وقتها من ضمنهم جثة طفل و48 شخص ناجي، وأتوقعوا وقتها غرق حوالي 30 شخص.
ومن أسبوع، وبعد حوالي 4 أشهر من غرق القارب، أعلنوا عن غواصة هندية هتبقى مكلفة بعملية البحث، واتقال إن متبرع مجهول قدم أكتر من 295 ألف دولار علشان يجيبوا الغواصة، وحددوا وقتها موقع الحطام على عمق 470 متر، وفي مصادر تانية بتقول 450 متر. الظابط اللي كان مسؤول عن تنفيذ العملية أخد قرار بالرجوع من وهما في عرض البحر بعد ما حصل حالات إغماء للإعلاميين اللي رايحين يغطوا العملية، ووقتها أعلنوا عن تأجيل مهمة البحث حفاظًا على سلامة الغواصة وطاقمها.
بس بعدها الغواصة بدأت تاني تدور ووقتها لقيت رفات ما لايقل عن سبع مهاجرين، وفقًا للي قالته البحرية اللبنانية، ولما حاولوا يلتقطوا الجثث اتفتت واتحولت لأشلاء، فاكتفوا إنهم ياخدوا صور للقارب والجثث من جوا، ومن ضمنهم صورة لأم شايلة طفلين كانت بتحاول تفتح باب الأوضة في المستوى السفلي من القارب. أول جثة لقوها كانت موجودة خارج الحطام بس معظمها اتحلل من الغرق، ورفات تانية لدراع ودراع وواضح إن دول شخصين كانوا ماسكين إيد بعض.
لحد دلوقتي مش عارفين السبب اللي حصل خلى القارب يغرق؛ الناجيين بيقولوا إن البحرية اللبنانية والطرادات العسكرية اصطدمت بالزورق وطوقوهم وبعدها القارب بدأ في الغرق، وواحد من الناجيين بيقول إنه لما طلب المساعدة من العناصر العسكرية واحد منهم قال “مبسوطين تموّتوا حالكن وعيالكم. بدّي قبّركم؟”، والجيش اللبناني بيقول إن القارب اصطدم بسفينة تابعة للبحرية لما كانوا بيحاولوا يهربوا.
الخطوة اللي مستنينها هي انتشال الزورق، واللي تُعتبر مهمة صعبة بس مش أصعب من المأساة الإنسانية اللي حصلت في بلد فيها 6 مليون نسمة منهم مليون لاجيء سوري، وفي وقت بتعاني فيه الدولة من انهيار اقتصادي بعد انفجار المرفأ.