#هنخرج_فين: 5 مطاعم هتلففك العالم من المعادي

هنخرج فين؟ هو السؤال اللي بتبتدي بيه كل شات مع صحابك يوم الخميس بليل، وبيخلص على مفيش، إحنا قررنا نجاوبلك على السؤال ده كل أسبوع، تابعنا عشان تتم الخروجة اللي مش عايزة تحصل دي.

المعادي معروفة بحاجات كتير، بالجمال، وبالهدوء، وبالتوهان، وأسامي الشوارع، بس الأهم من كل ده، المعادي منطقة بيفضلها الأجانب اللي بيشتغلوا في مصر، عشان كده هي أكتر منطقة في القاهرة عندها مطاعم من كل دولة في العالم، من كل ثقافة في العالم، وبيبقى أغلب الوقت، أصحاب المطاعم دي هما أجانب بيقدموا الأكل ده للجالية بتاعتهم في المعادي، عشان كده لما فكرنا في مكان يلففك العالم، ملقيناش أحسن من المعادي.

مش بس أكل شبه الأكل اللي هتشوفه في البلد دي لو زورتها، إحنا عايزينك تحس إنك سافرت، من الألوان للديكورات للمزيكا، للريحة اللي بيتميز بيها المكان، واللي خدها من الخبز والتوابل والمعطرات، اللي جاية من بلد تاني عمرك ما روحته.

شوف قايمة مقترحاتنا على الخريطة جاهزة تدوس عليها وتسوق أو تتمشى لحد المكان، وشاركنا بترشيحاتك لو انت من المعادي ولاففها وعندك مطعم لازم نجربه.

فيلا كاراكاس

• 

فيلا في شارع 9، من بابها بتحسسك إنك وصلت لبنان، ألوانها الأبيض في الفوشيا وديكورها وكنبها، بتوديك معاها للبنان، ننصحك تروح في النهار، أو ساعة السحر بتاعت قبل الغروب، عشان تطلع صور عالمية، أما منيو الأكل فده ياما اتحكى عنه حكايات، مهما كان احنا واثقين فيك إنك هتطلب فتوش ولبنة زعتر.

العنوان: 9 شارع 9، المعادي، دوس هنا عشان توصل لمكان الفيلا على الخريطة.

مهراجا المعادي

أماكن كتير في مصر بتقدم الأكل الهندي، بس مهراجا بس هو اللي عنده التجربة الهندي، يعني من أول ما تدخل المحل تلاقي الأحمر والبرتقاني والستاير المنقوشة والكنب المزخرف، في تماثيل للفيلة بتستقبلك من عالباب، الأغاني جوا هندي بس، والأكل حكاية تانية خالص، بص لو توهت أوي يعني في المنيو، بننصحك تطلب “مورج مالاي” فراخ في الجبنة السايحة والبصل، وآااه.. مخلل المانجو عندهم حادق بقوة 7 رنجه، عشان بس نبقى حذرناك، ومتنساش وانت ماشي تتصور بالتوب الهندي.

العنوان: قسم النهضة في المعادي، هتلاقي خريطة العنوان من هنا.

ساكورا سوشي

• 

الموضوع يبان بديهي يعني، مين ميعرفش ساكورا سوشي، ده أقدم مطعم ياباني في مصر، بس مش ده السبب، ولكن السبب إنه أكتر مطعم “ياباني” في مصر، تدخل تحس إنك في اليابان، الألوان، الأثاث، الديكور، كل حاجة، انت سافرت انت مش معانا هنا، وهو ده بالظبط الإحساس اللي المفروض يوصلهولك أي مطعم بيمثل مطبخ بلد معين، يبقى سفير للثقافة كلها، نموذج مصغر من البلد جوا المكان.

العنوان: 38 شارع 231، وادي دجلة، المعادي الغربية، هتلاقي الخريطة من هنا.

 Tutti matti

• 

كل تفصيلة معمولة عشان تنقلك ايطاليا أول ما توصل الفيلا، من الطوب على الحيطان لحد ألوان المفارش الحمرا والترابيزات المشهورة في إيطاليا، المزيكا وريحة البيتزا وهي بتتخبز في الفرن التقليدي اللي عندهم، اسم المحل معناه All mad، مجانين رسمي، وأحنا بنشجع كل أشكال الجنان في الأكل.

 العنوان: 49 ش 9 المعادي، دوس هنا عشان تلاقي المطعم على الخريطة.

مخبز Miette

لو كنت من اللي شافوا مسلسل “إيميلي في باريس”، واتعلقت بالمخبز باللي بتجيب منه كرواسون كل يوم الصبح، يبقى هتتبسط جدًا في المكان ده، الفرنساوين معروفين بالطبخ بس مش أي حد هيحب أطباقهم، لكن مخبوزاتهم وحلوياتهم لغة عالمية، مفيش اتنين يختلفوا عليها، المكان في وجبات فطار وحلويات، وسندوتشات، ومشروبات كمان، وطبعًا ديكور فرنساوي شبيه بمحل مخبوزات مسلسل إيميلي حتى فاترينته هي هي.

العنوان: شارع 209 معادي السرايات الجديدة، أو دوس هنا عشان تلاقي المخبز على الخريطة.

آخر كلمة: ماتفوتوش قراءة: دليلك الشامل لكل معالم القاهرة القديمة الثقافية والتاريخية في الخريطة دي!