على الرغم من ظروف الكورونا اللي عطلت كتير من الأعمال حول العالم، لكن صناعة السينما والدراما المصرية والعربية شهدت تطور وانتعاش كبير في الفترة الأخيرة. وبعد ما شوفنا أعمال درامية عظيمة في موسم رمضان اللي فات وكمان المسلسلات الـ off season، السينما كان ليها حظ من حالة الازدهار ده.. إمبارح شركة سينرجي للإنتاج نزلت برومو فيلم جديد واللي هيجمع نخبة كبيرة من نجومنا المفضلين.
الفيلم مأخوذ من قصة حقيقية عن الضربة الجوية اللي نفذتها القوات الجوية المصرية في ليبيا ضد تنظيم داعش. وبيظهر في الإعلان الفنانين أحمد السقا، شريف منير، كريم فهمي، آسر ياسين وأحمد حاتم وغيرهم من النجوم الكبار. الفيلم من إخراج أحمد نادر جلال وتأليف عمر عبدالحليم ومن إنتاج شركة سينرجي. ومن المتوقع نجاح كبير للفيلم ده، مش بس لإنه بيضم مجموعة كبيرة من الأبطال اللي كفيل وجودهم إنه ينجح أي عمل، ولكن كمان لإنه بيتناول قضية مهمة وبطولات حقيقية للقوات الجوية في القصاص لشهداء مصر في ليبيا.
وفي نماذج كتير لأعمال شبيها وحققت نجاحات ضخمة زيّ فيلم “الممر” اللي كان من بطولة أحمد عز وإياد نصار وهند صبري ونخبة كبيرة من الفنانين، واللي كان بيسلط الضوء على المخاطر اللي تعرضلها الجيش المصري وكمان الأزمات النفسية وقت نكسة 1967 وبطولاته في حرب أكتوبر سنة 1973. وكمان مسلسل الاختيار اللي شوفناه في السباق الرمضاني في 2020 واللي قدر يعمل ضجة وساب أثر كبير على كل المتفرجين، واللي كان هو كمان مأخوذ عن قصة حقيقية للكتيبة اللي استشهدت في ملحمة البرث. فهل تتوقعوا إن فيلم السرب هيحقق نجاح قوي زيّ الأعمال اللي ذكرناها؟