بقت عادة عندنا كل سنة في رمضان نستنى افتكاسات الحلويات اللي هتتعمل، وبنتفاجيء سواء من الأسماء اللي بيختاروها أو افتكاسات المكونات نفسها من خلال اللعب في هوية الطبق، وزي ما في تريندات مسلسلات رمضان بقينا نلاقي تريندات الحلويات، ياترى بقى التريند والافتكاسة على إيه السنة دي؟
البسمولة المعكوسة
من خمس سنين قرروا يعملوا اختراع مصري سوري كنوع من رجوع الوحدة العربية ويسموها البسمولة (بسبوسة على معمول)، قولنا تمام ماشي بس السنة دي قرروا ياخدوا البسمولة ويعكسوها وتبقى وسط طبقات من الكريمةمتغرقة بالفراولة والمانجو والميكس بقى ياميش، هتلاقيها فيTBS في كل الفروع بـ625 جنيه.
المكشوفة
مش عارفين هو مين كشفها بالظبط هل حد كشف التريند قبل ما يطلع وفضح سر المكونات علشان كده اتسمت مكشوفة؟ بس على العموم لفضولك اللي هيموتك سألنا على المكونات اللي كنت استحالة تعرفها لوحدك، لاقينها عبارة عن قالب من الكنافة المحشي بكريمة البافاروز الخاص بتورتينا وكيك دكواز اللوز مع الفراولة اللي قالوا إنها لازم تبقى طازة وختموها بكروكند اللوز، بعيدًا عن كل المكونات مادام مش قافشين هوية للأكلة ممكن تطلع حلوة، سعرها 675 جنيه.
المكسوفة
ماحدش قالنا هي مكسوفة من إيه بالظبط، بس احنا استنتجنا إن المكسوفة نتيجة للمكشوفة، يعني طالما اتفضحت وبقت مكشوفة لازم تتكسف على دمها، والأهم من ده أن مكوناتها عبارة عن قالب من الكنافة المحشي بصوص الطوفي المملح مع كريمة الشوكولاتة والمكسرات المحمص، وسعرها زي أختها 675 جنيه مصري.
الطسطوسة
"الهرم والطسطوسة" اختراعات بلبن في رمضان 🌙
"الهرم والطسطوسة" اختراعات بلبن في رمضان 🌙
Posted by Food hunter – فود هانتر on Sunday, March 10, 2024
بلبن نازل السنة دي بالطسطوسة، دي بقى بصراحة عجزنا عن فهم معناها، جربنا ندور يمكن نفك شفرة المعنى ونعرف كان في نيتهم إيه بس بدون فايدة، لكن سألنا على مكوناتها وطلعت كريم بروليه عليه كيكة الزبدة اللي متسقية شربات وزبدة برضه، وكل ده هيجيلك متغطي بالكريمة والقشطة عليها طبقة كنافة متحمصة في السمنة البلدي وعليها قطع فراولة بلدي من أول قطفة أو قطع مانجا اسمعلاوي، لو عايز تدبها وماترحمش ممكن تطلب الاتنين، وفي اختيار رابع بقى لعشاق زيادة السعرات الحرارية الطسطوسة بالشيكولاتة نص كيندر بوينو أصلي ونص نوتيلا بندق بـ200 جنيه.
حلا، حالو، حلولو
بلبن ماوقفش عند الطسطوسة، نزل بتلات أخوات قرروا يتجمعوا مع بعض في هرم تحت عنوان “هرم الحلو الرمضاني” وكل طبقة بحكاية ورواية منفصلين ممكن ييجوا مع بعضهم أو تقدر تفرقهم عن بعض وتشتري كل هرم لوحده، ومن استنباطي هما حاولوا يتقمصوا أغنية رمضان “حالو يا حالو” وطلع معاهم بالتلاتة دول.
حلا عبارة عن بسبوسة بالسمن البلدي وفي النص خليط كريمة لباني وحليب مكثف ومتغطية بالكريمة، وحالو عبارة عن كنافة محمصة عليها قشطوشة غرقانة بميكس القشطة وقطع فراولة وكل ده عايم في الكريم بورلية، وحلولو كيكة زبدة متسقية بالشربات وعليها كريمة لباني وغرقانة في المانجا.. والهرم كله بـ600 جنيه وفي أحجام صغيرة.
صوابع جيجي
هتلاقيها في نولا بـ750 جنيه، بس السؤال الأهم واللي بيطرح نفسه هي صوابع زينب قصرت معاكوا في إيه؟ ما طول عمرنا عايشين من خيرها ولا دي بنتها بتكمل المسيرة؟ المشكلة أن الناس أخدت الموضوع على محمل الجد خصوصًا الرجالة واعتبرتها من مبطلات الصيام كنوع من أنواع التحرش بيهم وهما منعزلين ومعتكفين.
كنافه ميل فاي
جمعوا الشرقي وقرمشته المتمثل في الكنافة مع النعومة المتمثلة في الميل فاي مع إضافة جديدة بقطع المانجو، المرة دي مفيش افتكاسة في الاسم أوي بس في افتكاسة في الهوية وبـ420 جنيه.
كنافة باسكو
كنافة باسكو اختراع جديد من ليدام، مش عارفة إيه سر الاسم بس أكيد نابع من مكوناتها اللي ماعرفتش أنطقها والعجيبة في نفسها، بسبوسة وجوز هند ماشي معروف بس إيه كريمة نوتيلا وايت مع فيوتين مع اسبونج أبيض ده؟
آخر كلمة: ماتفوتوش قراءة: قليلاً من البهارات والخبرات الحياتية: لماذا تجاوز طعام الشارع مجرد سد الجوع؟