حالة من البهجة والسعادة سيطرت على الجو في محطة مترو هليوبوليس يوم الجمعة اللي فاتت، حيث بدأت ولأول مرة فى مصر الفعاليات الفنية والثقافية فى محطات المترو، واللي قدرت تحقق شكل من أشكال التفاعل الفنى المباشر ما بين الفنانين والجمهور.
فى الخط الثالث “الأخضر” تم تنظيم يوم كامل مع الفن والفنانين بواسطة مؤسسة “أراك” للفنون والثقافة وبالتعاون مع شركة إدارة وتشغيل المترو RATP، وتحت إشراف الهيئة القومية للأنفاق، وبرئاسة دكتور عصام والي رئيس الهيئة، وبهدف نشر الفن، ومشاركة الجمهور، ورفع مستوى الذوق العام.
“ناس من هليوبوليس” كانت الفعالية الأولى، مع 10 من شباب التشكيليين وشباب “الفنون الجميلة”، وتحت إشراف الفنان “مراد درويش” رسموا أكتر من 100 إسكتش وبورتريه حي لجمهور المترو، واللي هيتم استخدامهم لتنظيم معرض فني هيتم فيه عرض البورتريهات دى فى المحطة نفسها.
ثلاثية هليوبوليس كانت الفعالية الموازية اللي أبدع فيها 3 فنانين، ورسموا 3 جداريات كبيرة لتجميل المحطة، والفنانين هما “سامح إسماعيل” فنون إسلامية وخط عربي، “علاء عوض” من الفن المصري القديم، “مينا ميلاد” من الفن القبطي.
فعاليات ناس من هليوبوليس الفنية كانت كلها كانت رسم حي وسط إنبهار وسعادة جمهور المحطة، والمفاجأة كانت ردود الأفعال الإيجابية من الناس، وتفاعلهم ومشاركتهم مع الفنانين، ومفاجأة من رئيس الهيئة، ومن رئيس شركة تشغيل المترو الفرنسية، بجوائز خاصة وتكريم للفنانين الشباب على شغلهم المتميز.
كلمنا الدكتور أشرف رضا، الأستاذ بكلية الفنون الجميلة، عن الفعالية الفنية في محطات المترو وشكر جمهور المترو، وجمهور مصر الجديدة، وقدم شكر لكل المسئولين والعاملين في شركة RATP على مجهودهم فى التنظيم والإشراف بالتعاون مع مؤسسة أراك للفنون، وشكر مجموعة الزملاء الفنانين والشباب اللي شاركوا فى الفعاليات الفنية، والألوان المميزة من “كادنس”، وفريق عمل “أراك” للفنون والثقافة نفسه، وختم كلامه بجملة “وإلى لقاء جديد فى محطة جديدة”، واللي بيؤكد لنا إن الفعالية الفنية المميزة اللي شهدتها محطة مترو هليوبوليس هتتكرر تاني في محطات مترو تانية، وإحنا منتظرين نشوف الفعاليات التانية ونقيس ردود فعل الجماهير عليها.