فتاة العرب: ليه عوشة السويدي تعتبر من أهم الشاعرات في الأدب العربي الحديث

النهارده جوجل بيحتفل بالشاعرة الإماراتية الملقبة بفتاة العرب، عوشة بنت خليفة بن الشيخ أحمد بن خليفة السويدي، من مواليد العاصمة أبو ظبي في سنة 1920، ومن بعدها ابتدى البحث يزيد عنها والناس حابة تعرف عنها أكتر، وعن القصة ورا لقبها “فتاة العرب” وازاي بدأت في الكتابة والشعر من وهي عندها 12 سنة، ونظمت 100 قصيدة موزونة خلال شهر تقريبًا.

عن: oshaaward

بدايتها كان سبب فيها البيت الفني اللي اتربت فيه واتأثرت به، لإن بيتها كان فيه رجال علم وشيوخ مش بيغادروا مجلس والدها، فتأثرت بالأجواء دي وابتدى مشوارها الأدبي من سن 12، هي اتولدت في أبو ظبي لكن عاشت معظم حياتها في إمارة العين، وبعدها عاشت 15 سنة في قطر لكن رجعت مرة تانية للعين، وانتقلت لدبي في أواخر التمانينات، كل ده كان له دور في حياتها الأدبية.

من سن 15، عوشة اكتسبت اعتراف وطني بقصائدها الشعرية القوية، ونجاحها ده فتح الباب قدام أجيال من الشاعرات في نوع أدبي كان وقتها بيهيمن عليه الرجال فقط، وتعتبر عوشة من رواد الشعر في الإمارات والمنطقة العربية، لإنها ألفت عدد من القصائد في مختلف مجالات الشعر، زي الغزل والنقد الاجتماعي والمدح والإسلاميات، وحضرت مجالس كبار الشعراء.

لقب فتاة العرب جيه ازاي؟ من ديوانها “فتاة العرب” اللي يعتبر مجمع فيه قصائدها اللي اتنشرت في عدد من الصحف والمجلات، وفي قصائدها كانت متأثرة في كتاباتها بالماجدي بن ظاهر والمتنبي، فأسلوبها له طابع خاص ومتأثر بكبار الشعراء العرب.

احتفال جوجل بها مش بمناسبة ميلادها، لكن في اليوم ده سنة 2011 تم الاعتراف بإسهاماتها في الأدب وده كان في حدث مرموق، وكمان المجتمع الشعري عمل جائزة سنوية للشاعرات الإماراتيات باسم “عويشة السويدي” وكمان تم تكريم عويشة بقسم خاص من متحف المرأة في دبي.

آخر كلمة: ماتفوتوش قراءة: الضريبة الوردية: ليه بنلاقي اختلاف في أسعار نفس المنتجات بين الرجالة والستات؟

تعليقات
Loading...