فاطمة سعيد كانت أول سوبرانو مصرية تغني بقاعة ألبرت هول الملكية في لندن، واترشحت دلوقتي لجائزة أفضل صوت في BBC Music Magazine لسنة 2021، عن ألبومها الأول “النور” اللي قدمت فيه 17 أغنية اختارتهم ما بين الأوبرالي والكلاسيكي القديم، وأنماط متنوعة، ماقتصرتش بس على الغناء الأوبرالي اللي هي متميزة بيه، وتقدروا تصوتولها في المسابقة من هنا، وتعالوا نشوف مين هي فاطمة سعيد وإيه الحدث الكبير في إنها تغني في قاعة ألبرت هول الملكية في لندن.
فاطمة مغنية مصرية اتولدت في القاهرة، ومن هي عندها 14 سنة خدت أول درس غناء لها في الاستوديو الصوتي بدار أوبرا القاهرة، وبعدها أدرك مدرسينها وعيلتها كمان موهبتها وشجعوها على إنها تكمل دراستها بره مصر، واتقبلت في مدرسة ايسلر للموسيقى في برلين، وبعد ما حصلت على البكالوريوس فيها، حصلت على منحة دراسية في أكاديمية ديل تياترو آلا سكالا في ميلانو، وبقت أول سوبرانو مصرية تغني على المسرح العريق ده.
وفي خلال سنين دراستها وحياتها المهنية فازت فاطمة في كتير من مسابقات الأوبرا الدولية منها مسابقة فيرونيكا دون الدولية للغناء في دبلن، ومسابقة ليلى جينسر الدولية للأوبرا في إسطنبول، الجائزة الكبرى في مسابقة جوليو بيروتي الدولية للأوبرا الأولى باللغة الألمانية، وكمان حصلت على الجائزة الأولى في المسابقة السنوية للموسيقيين الشباب التي بتعقد في ألمانيا، ده غير إنها مثلت مصر في يوم حقوق الإنسان في الأمم المتحدة بجنيف، وغنت جنب خوان دييجو فلوريز، وغنت من أجل حق الأطفال في التعليم والكرامة من خلال الموسيقى.. وفي سنة 2016 حصلت فاطمة سعيد على جائزة فخرية من المجلس القومي للمرأة في مصر، وبقت أول مغنية للأوبرا تحصل على جائزة الإبداع للدولة عن إنجازها الفني المتميز على المستوى الدولي.
وعن كونها أول سوبرانو مصرية تغني في قاعة ألبرت هول الملكية، اللي تعتبر واحدة من أهم القاعات الموسيقية في أوروبا اللي تم بنائها بين سنة 1867 و1871، واسمها “ألبرت” لإن اللي سمتها الملكة فكتوريا كذكرى لزوجها الراحل الأمير ألبرت، والقاعة تتسع لنحو 5 آلاف شخص، وغنى فيها قبل كده من العرب فنانين كبار زيّ عبدالحليم حافظ، وصباح، وكاظم الساهر، ونجوى كرم.