مش عارفين إيه اللي بيفكر الناس فجأة بمشاهد معينة من مسلسلات فات سنين على عرضها، ولكن اللي بيحصل إن في حد بيقرر فجأة إنه يتابع مسلسل قديم، ويلفت نظره مشهد معين فيقرر يشارك الناس على السوشيال ميديا، وفجأة بنلاقي الدنيا اتقلبت كوميكس وميمز على السوشيال ميديا.. وده اللي حصل بالظبط مع مسلسل هذا المساء لما حد عرض مقطع الناس كلها شافته غريب وكوميدي من ناحية سياق الكلام.
فبتظهر في المشهد أروى جودة وهي نازلة مع محمد سليمان من الأوضة، فبيلاقوا إياد نصار اللي المفروض جوزها في المسلسل، اللي طبعًا بيشك فيهم فبيبدأ يزعق ولكن بتبدأ تزعق فيه أروى باستغراب واستنكار إنه شك فيهم، وبتبرر موقفها بإن “ده هاني” فطبيعي إنه يكون في البيت.. ومن هنا، بدأ رواد السوشيال ميديا يعملوا آلاف الميمز اللي بتتمحور حوالين فكرة إن هاني ده أمان ومفيش منه خوف.. فتعالوا نشوف بعض من الكوميكس اللي ملت الـ”news feed” بتاعتنا الفترة اللي فاتت من رواد السوشيال ميديا، ونجوم زيّ محمد هنيدي اللي اشترك في التريند.
وعلقت أروى جودة على التريند ده وقالت إنها “أحلى حاجة حصلتلها من فترة” وإن هي مش عارفة إيه اللي فكر الناس بالمشهد ده، ولكنها سعيدة إن لسه الناس بتتفرج على مسلسل “هذا المساء” رغم إن عدى 3 سنين على عرضه وقالت إنها بتحبه وفخورة بالعمل ده.