بعد اللخبطة اللي حصلت والخطط اللي باظت بسبب الموجة التانية من فيروس كورونا المستجد، معظم خططنا لاحتفالات رأس السنة باظت والسفر كمان بقى صعب، لكن الفنانين لجأوا للحل الأسرع، وهي الحفلات الأونلاين، وفي أكبر مهرجان موسيقي يتعمل من غير جمهور، اللايف كل يوم من 12 الضهر لـ 8 بليل، لحد يوم 30 ديسمبر على قناة theteaparty على اليوتيوب، بمشاركة 30 فنان وفرقة من الأردن، بيقدموا موسيقى مستقلة أو زيّ ما بيتقال عليها موسيقى بديلة، والأردن من سنين بتتربع على عرش الموسيقى المستقلة وبتقدم كتير من الفرق والفنانين اللي بيضيفوا للأغاني والموسيقى شكل جديد ومختلف عن العادي، فتعالوا نشوف بعض الفرق والفنانين اللي هيشاركوا في المهرجان ده، وقولولنا إيه أكتر أغاني بتحبوها ليهم.
المربع
فرقة أردنية، اتشهرت بستايل مختلف في الموسيقى، وبصوت محمد عبدالله المميز اللي بيدي الأغاني طابع خاص مع الموسيقى بتاعتهم اللي بتجمع بين أكتر من نوع، من “تحت الأرض” لـ “مختلفين”، أغاني كتير بنحبها ومستنيين نسمعها لايف في المهرجان، لحد ما زيّ ما قالوا يبقي لينا موعد على شط النيل.
محمود ردايدة
أحد مؤسسي فرقة جدل، اللي معروفة بميلها لموسيقى الروك، وبيقدموا النوع ده من الموسيقى بطابع عربي، وأول ألبوم ليهم بالفعل كان بيحمل اسم “الروك العربي”، في وقت ماكنش منتشر فيه الفكر ده، هما بدأوا الطريق، وبصوت ردايدة، اللي يعتبر مختلف عن أغلب المطربين العرب، بيقدر يكمل الحالة المختلفة من الموسيقى والكلمات بطريقة تخليك تدور وتسمعلهم أكتر.
أيلول
هياخدونا في لفة بعنوان هما قالوه في أغانيهم، “امسكني بإيدي واسحبني من هالكون ع دنيا أنقى شوي” هتقدر تفصل معاهم عن العالم اللي مليان دلوقتي بسلبية عايزين نبعد عنها، بموسيقى مختلفة.
El Batsh | البطش
لو بتحب تسمع راب، المهرجان مش هيفوت النوع ده طبعًا، تقدر تسمع الراب الأردني بطريقة مختلفة.