قلق على السوشيال ميديا شغال بقاله شوية بسبب تريند طلع للأرقام، بدأنا نشوف بدون أي سابق إنذار بوستات (منشورات) وستوريز (حالات) كلها أرقام من 901 لـ926، أرقام طالعالك من كل حتة.. طب فهمونا يا جماعة الكلام على إيه؟ ده خصم جديد نازل ولا ده رقم اتوبيس ولا نمرة عربية جديدة ولا رقم جلوس ولا شفرة سرية؟
بعد بحث عرفنا إن الأرقام دي ناس قرروا على مواقع التواصل الاجتماعي إنهم يستخدموها للتعبير عن حب شخص ما مجهول مش عارفين يقولوا له، اسمه بيبدأ بحرف من الحروف الأبجدية، ولإن الحروف الأبجدية 26 الأرقام الشفرة من 901 لـ926 لا أكتر ولا لأقل، فهتلاقي إن كل حرف بيرمز لرقم بالترتيب.
هبسطهالك .. 901 يعني أنا بحب شخص الحرف الأول من اسمه هو “A”، أسماء بقى أو أحمد والحدق يفهم، وبما إن A هو أول الحروف الأبجدية فشفرته 901 .
ولو لقيت حد كاتب 915 معناها إن الشخص اللي كاتبها بيحب حد الحرف الأول من اسمه هو “O”، أسامة بقى أميمة مش فارقة، لإن ترتيب O بين الحروف الأبجدية هو 15.
في تريندات تانية كانت بتظهر من حين لآخر الناس بتستخدمها علشان تعبر عن تحدي رومانسي بتلميح، ياترى كنت من أنهي فئة؟