بعد ما انتشرت صورة على السوشيال ميديا لقايمة جواز، كتب فيها أبو العروسة “مَن يُؤتَمن على العِرض لا يُسألُ عَن المال” وشرطه الوحيد للعريس إنه يتقي الله في العروسة، وبيأتمنه على الجهاز وحق العروسة. الصورة انتشرت بسرعة كبيرة، وانتشر معاها ردود أفعال مختلفة من الناس، من الهجوم الشديد على الفعل ده وإن ده يعتبر إهدار لحق البنت في حالة الطلاق أو أي خلافات تحصل، وبين دفاع وتأييد للفعل ده وإنه تسهيل للجواز ومراعاة لظروف الشباب حاليًا.
طبعًا مانقدرش نفوت تريند أو حدث كده ويمر مرور الكرام من غير ميمز، تعالوا نشوف الناس اتعاملت ازاي وردود أفعالهم كانت إيه على فتح المناقشة في قايمة الجواز.
مبدئيًا، القايمة دي بيتكتب فيها المنقولات أو الجهاز، اللي جابوه الزوجين، وبيمضي عليها الزوج، وبتكون بمثابة عقد أمانة، وبيتكتب فيها المبلغ الإجمالي، وفي حالة الطلاق، بيكون من حق الزوجة الجهاز ده والفرش، وكمان بيعتبر تبديد أو إتلاف المنقولات دي جريمة، ومن زمان بتعتبر القايمة دي عرف في المجتمع المصري، موجودة كمان في القانون، وبتتم بالإتفاق بين العيلتين، سواء هتتكتب من الأساس أو لأ، علشان تضمن حق الزوجة.
بعد انتشار الصورة دي اتفتحت المناقشة عن الموضوع، وكتير من الناس شافوا إن عدم كتابتها ده إهدار لحق البنت، خصوصًا مع زيادة معدل الطلاق، وانتشاره بين الشباب خصوصًا، واعتبار إنه في الزمن ده ماحدش يتضمن، ومن ناحية تانية، فيه اللي رفضوا كتابة القايمة لكن بنظرية إن ده تسليع للمرأة، وإن مش ضمان الفلوس أو الجهاز هو اللي هيضمن كرامة البنت أو يضمن لها حياة زوجية كريمة. وفي اللي كانوا ضد كتابة القايمة وإن لو الزوج فعلًا مش هيؤتمن على الزوجة، مش شوية فرش ولا قايمة هما اللي هيخلوه راجل وياخد باله منها ويحافظ عليها.
نقول تاني
الموضوع سهل وبسيط، مش عاوز تمضي ع القايمة؟
جهز شقتك من مجاميعه ومراتك ما تجيبش قشاية، وادفع مهر.
وعيش ملك…Posted by Omar H. HG on Thursday, June 3, 2021
من يؤتمن ع العرض لا يُسأل عن المال اية يابت انتي فاكرة نفسك هاتتجوزي عمر بن الخطاب؟
Posted by Yasmine Soudy on Thursday, June 3, 2021
وفي اللي كانوا ضد كتابة القايمة وإن لو الزوج فعلًا مش هيؤتمن على الزوجة، مش شوية فرش ولا قايمة هما اللي هيخلوه راجل وياخد باله منها ويحافظ عليها. وإن الصورة المنتشرة دي تعتبر أغلى قايمة اتكتبت، لإنها بترفع من شأن البنت وإنها مش بتبص للماديات.
وغير كل ده، في ناس من كوكب تاني خالص، لكن ردودهم تستحق الذكر.
إمضي على أي حاجه إنت يا جرجس ميهمكش إحنا معندناش طلاق.
Posted by Rady Talaat Nathan on Friday, June 4, 2021
الرجال من المجتمع والنساء من الزهرة
Posted by Amr Abo Zeed on Friday, June 4, 2021