بعد احتفال جوجل بعيد ميلادها: مين هي الكاتبة المصرية أليفة رفعت؟

النهاردة، جوجل بيحتفل بالذكرى الـ 91 لميلاد الكاتبة المصرية أليفة رفعت، لكن ناس كتير ماتعرفش هي مين، علشان كده بنستغل فرصة عيد ميلادها علشان نتكلم عنها أكتر. الكاتبة النسوية فاطمة رفعت، اللي اشتهرت باسم أليفة، معروفة بحبها لكتابة القصص القصيرة، وتاريخها في الكتابة عن حقوق المرأة والنسوية، بكل الأشكال، وفي زمن ماكانش فيه النوع ده من الكتابة في القضية دي منتشر، وكمان قدرت تتكلم في قصصها عن حياة الستات في الريف المصري، وكمان كتبت عن العلاقات الأنثوية والمعارك العاطفية.

اتولدت سنة 1930 في القاهرة، ومن صغرها وهي بتحب الكتابة وبتحلم تكون كاتبة، وبالفعل كتبت أول قصة قصيرة وهي عندها 9 سنين، القصة كانت بتدور عن قرية بتروحها هي وأسرتها في الصيف، ودي كانت أول حاجة خيالها وقلمها وصلوا لها، وقتها أختها الكبيرة عنفتها بسبب كتابتها بدل ما تشجعها، لكنها كملت وفضلت ورا حلم الكتابة، رغم رفض أهلها إنها تدخل الجامعة، وإنهم خططوا لزواجها علشان يمنعوا حلمها، لكنها فضلت مكملة في حلمها.

وبسبب القيود دي، اضطرت تنشر كتاباتها باسم مستعار، وهي دي حكاية اسم “أليفة رفعت” بدل فاطمة، ونشرت كتاباتها بالاسم ده في الفترة من 1955 لـ 1960، لكن زوجها رفض فنها ومنعها من إطلاق أعمالها لأكتر من 10 سنين، لكن في أوائل السبعينات، بدأت أخيرًا تكتب قصصها القصيرة مرة تانية، وأصدرت مجموعة منها بعنوان “المنظر البعيد للمأذنة” في سنة 1983، 15 قصة خيالية بتاخد القراء للعالم العاطفي، وبتخليهم يواجهوا بشجاعة المواضيع المحظور فيها الكلام، على أمل إنها تشجع الستات اللي زيّها إنهم يتكلموا عن حقيقتهم.

أليفة رفعت اتكرمت بجائزة التميز من جمعية الأدب الحديث، لأكتر من 100 عمل منشور، وتم ترجمة عدد كبير من الأعمال دي للغات كتير، وكمان اتذاعت وتم قرائتها في وسائل إعلامية دولية كبيرة، واتوفت أليفة سنة 1996، عن عمر 65 سنة، بعد مسيرة من المكافحة لحلمها وحلم كتير من الستات، اللي كانت بتشجعهم يعرفوا حقوقهم علشان يقدروا يطالبوا بيها.

آخر كلمة: ماتفوتوش قراءة: لبنى عبد العزيز ودورها في تقديم الحركة النسوية في السينما المصرية

تعليقات
Loading...