علشان ماتتلخبطش، التقويم الميلادي هو تقويم بيعتمد على الشمس في حساب الوقت، والتقويم ده النهارده 2022 بدأ بميلاد المسيح. لكن الحقيقة إن التقويم ده بأسماء الشهور بتاعته وحساباته الفلكية ومنظومته كلها هو اختراع روماني كان موجود من قبل المسيح. في التقويم الروماني كان التأريخ بيبدأ بإنشاء مدينة روما سنة 753 قبل الميلاد.
كان في لخبطة وتعديلات كتير حصلت على التقويم الميلادي لحد ما وصلنا لشكله الحالي. يعني مثلًا في وقت معين كانت السنة عشر شهور بس وكان عدد الأيام بيوصل لـ 377 يوم في سنين معينة.
بعد احتلال روما لمصر، استغل الرومان المعرفة الواسعة عند المصريين لعلم الفلك، واستعان يوليوس قيصر بواحد من الفلكيين الأسكندريين اسمه سوسيجنيو علشان يصلح التقويم الروماني. وبالفعل خلى سوسيجينو السنة 365 يوم وربع، وبدل اللخبطة خلاها 365 يوم بس والربع ده بيتضاف كل أربع سنين على شكل يوم زيادة هو يوم 29 فبراير. تم استخدام التقويم ده أول مرة سنة 49 قبل الميلاد وبقى اسمه “التقويم اليولياني”.
ولد المسيح، ولد النور، ولد التاريخ، هللويا
في نص القرن السادس بعد الميلاد، دعا الراهب الأرمني ديونيسيوس اكسيجونوس إن يكون ميلاد المسيح هو بداية التقويم ونجح الراهب في الدعوة بتاعته وبقى عد السنين من سنة 532 ميلاديًا بيعتمد على سنة ميلاد المسيح.
لكن حسابات ديونيسيوس لسنة ميلاد المسيح بالظبط اتعرضت لنقد وتعديل كتير على مدار التاريخ. إيه اللي حصل؟
امتى ولد المسيح؟
على حسب التقويم اليولياني، المسيح ولد يوم 25 ديسمبر ويناير اللي بعده بقى أول شهر في سنة 1 ميلاديًا. والتاريخ ده اتفقوا عليه في مجمع نيقية الكنسي سنة 325م. وقالوا إن عيد ميلاد المسيح كان فى أطول ليلة وأقصر نهار (فلكياً)، واللي بيبدأ بعدها الليل يقصر والنهار يطول. لإنه على حسب المجمع كان ميلاد المسيح هو قدوم النور (النهار) للعالم.
الفلكي الروماني أليسيوس ليليوس طلع وقال لأ، السنة في الحقيقة هي 365 يوم و5 ساعات و48 دقيقة و46 ثانية، مش ربع يوم كامل يعني. وبكده بقت السنة في “التقويم اليولياني” أطول من الحقيقة بـ 11 دقيقة.
وعلشان كده قرر بابا الفاتيكان جريجوري فى عام 1582م إنه لازم نزود عشر أيام على التقويم اليولياني ونحوله لتقويم جديد بأخر تحديثات فلكية. وفي يوم 4 أكتوبر أعلنوا إن اليوم اللي بعده هيبقى يوم 14 أكتوبر على طول. وبكده بقى ميلاد المسيح يوم 7 يناير مش 25 ديسمبر، على حسب التقويم الجديد اللي بقى اسمه “التقويم الجريجوري”، علشان يبقى ميلاد المسيح في أطول ليل وأقصر نهار في السنة.
إيه الفرق بين الكريسماس يوم 25 وبين احتفال 7 يناير؟
أولًا كلمة “كريسماس” هي كلمة نصها الأول “كريس” جاي من اليونانية ومعناه المخلص، والجزء التاني “ماس” ومعناه الولادة، “ولادة المخلص”، والكلمة اعتمدتها الكنائس القبطية في مصر من زمان جدًا. وبسبب قوة تأثير الكنيسة القبطية على العالم بقت لفظة كريسماس هي المعروفة في العالم كله.
في ناس لسه بتحتفل بميلاد المسيح يوم 25 ديسمبر، على حسب التقويم اليولياني القديم، زيّ الكاثوليك، اللي في نسبة كبيرة أوي منهم في مصر. وفي ناس تانية بتحتفل بيه يوم 7 يناير زيّ الأرثوذوكس الأقباط في مصر، وده على حسب التقويم الجريجوري.
رأس السنة وعلاقته بالكريسماس
الاحتفال برأس السنة مالوش أي علاقة بالكريسماس، وهو مجرد احتفال غير ديني، والناس فيه بتحتفل بمرور سنة وقدوم سنة جديدة، وبيحتفلوا بالأمل والرغبة في السعادة. ولكن يمكن علشان في اليومين بنحتفل بالأمل والرغبة والسعادة ويمكن بسبب قرب اليومين من بعض، فالاحتفال باليومين بقوا مرتبطين ببعض.