وأنت بتتفرج على أفلام عربي خصوصًا لو قديمة، هتلاقي إن في شلة مثلًا هي اللي كانت محتكرة أدوار الشر في فترة معينة، ورغم إنهم كانوا بيتكرروا في أفلام كتير بأدوار الشر، تحس يا أخي إنك برضه مش قادر تكرههم، وبتحب تتفرج على الدور وتستمتع بإتقانهم للدور وإن دمهم خفيف، وتلاقي إننا ممكن نطلق عليهم لقب “أشرار لكن ظرفاء”.
محمود المليجي
عميد الشر في الأفلام المصرية، وده لقب احنا اطلقناه عليه، لإنه تقريبًا أدوار الشر مثلت 99% من مشواره الفني، ورغم كده هتلاقي إنك مش قادر تمنع نفسك من إنك تضحك على الإفيهات اللي بيقولها، أو على طريقته في المكر والدهاء زيّ ما بيقولوا في الزمن ده، والخطط اللي بيحطها. الممثل المصري محمود المليجي رئيس العصابة اللي مش هتتوقع إنه هو اللي ورا كل مصايب الفيلم، هتحب الطريقة اللي خلته يتقن الأدوار دي لدرجة إنك ممكن تشك إنه شرير في الحقيقة، لكنه أكتر ممثل الفنانين أجمعوا إنه أطيب من كده بكتير.
وده تقرير عنه اتعمل من قنوات روتانا، عجبنا جدًا وقولنا نشاركه.
باسل خياط
الأشرار لكن ظرفاء مش بس في الأفلام القديمة، لكن كمان الممثل السوري، باسل خياط، قدر يدخل الموسوعة دي بجدارة، بيتحدى نفسه وداخل المسابقة بأفلام ومسلسلات ولو قدر يثبتلك ده في أعمال فنية تانية هيعمل كده، طلع العقد النفسية كلها في أدواره من أبسطها لأكثرها تعقيدًا، ورغم كده برضه تبقى بتحبه، وبتستنى المشاهد بتاعته في الفيلم أو المسلسل، وتحاول تتوقع المستوى اللي هيوصل بيه في الشر، ودايمًا هو هيفاجئك ويعلي عنه.
عادل أدهم
الإفيهات بتاعته لسه بتتقال لحد دلوقتي، واحد من ألذ أشرار السينما المصرية اللي وأنت بتتفرج عليه ماتبقاش قادر تحدد بتكرهه للشر اللي هو فيه ولا تضحك على خفة دمه وإفيهاته، مش بيبقى محتاج يخدعك أو يمثل إنه طيب، لأ هو شرير وهو عارف وأنت عارف بس برضه مش قادر تكرهه، الممثل المصري عادل أدهم إفيهاته معظم الوقت بتكون حكم ممكن تمشي بيها في حياتك. مهما كانت الطبقة الاجتماعية، عادل أدهم الشرير الرسمي فيها، شرير في منطقة شعبية هو الفتوة بتاعها، أو الولد البايظ اللي في عائلة عريقة وبيخطط بكل بكل شر لأي حد.
نجمة إبراهيم
طبعًا أيقونات الشر دي ماكانتش بتقتصر على الرجالة بس، الممثلة المصرية نجمة إبراهيم من أول دورها كـ “ريا” واحنا هنريحوكي يا شابة، وجملتها الأيقونية “الولية عضت إيدي وأنا بخنقها تقولش عدوتها”، يعني شريرة وعارفة إنها شريرة ومستغربة الناس حواليها كمان بيعترضوا على شرها، صحيح إيه البجاحة اللي احنا فيها دي.
ورغم كده، هتلاقي إنك بتحبها، أينعم مش هننكر إنك لازم تخاف منها، بس برضه هتحبها، خصوصًا دورها في فيلم “لن أبكي أبدًا” اللي لحد ما ماتت كانت شريرة فيه، ولأخر لحظة بتجري ورا هدف سامي هو الشر. كانت رئيسة عصابات وعائلات كلهم رجالة بشنبات زيّ ما بيقولوا، وهي اللي كانت مسيطرة.
قصي خولي
زيّ ما شوفنا دوره في “خمسة ونص” شر أصيل فعلًا، بس برضه الناس حبته وماكانتش متخيلة منه الشر ده، وعجبهم الدور. الممثل السوري، قصي خولي، كان بيجسد في المسلسل ده الحقد والشخص اللي بيحفر نهايته بإيده، لكن عرف يجسد الدور بطريقة تخلّي المشاهد نفسه مش عارف يكرهه برضه.
توفيق الدقن
عن: اليوم السابع
ممكن نقتبس من أشهر إفيهاته ونحرّفه شوية علشان يليق عليه، ونقول “أحلى من الشر مفيش”.. الممثل المصري توفيق الدقن كان من ألطف أشرار السينما المصرية في كل مراحل حياته، من أدواره وهو شاب وعايز يبوظ قصة حب البطل والبطلة ويتجوز هو البطلة، لأدواره وهو بيرازي اللي رايح واللي جاي في الشارع بسبب ومن غير سبب، لحد ما بقى رئيس عصابة وعامل قلق، بس الفكرة إن في كل الحالات هتلاقي إنك برضه بتحبه، وبتضحك على إفيهاته وغلاسته حتى لو كانت على بطل الفيلم نفسه، اللي دايمًا بتكون متعاطف معاه وبتحبه، توفيق الدقن قدر يغير القاعدة حب البطل دي.
ميمي شكيب
زيّ ما أنت شايف في الصورة كده بالظبط، شريرة وبتعمل مقالب في طوب الأرض، حتى الكومبارسات اللي كانوا بيعدوا كده في الفيلم بس ماكانوش بيسلموا من شرها ومقالبها، بس ماتعرفش ليه برضه زيّ السكر على قلبنا، الممثلة المصرية ميمي شكيب ببنضحك على إفيهاتها، حتى وهي حماة رخمة وبتعمل مشاكل في مرات ابنها وحماته كمان، بس مقالبها لذيذة ودمها خفيف.
نزار أبو حجر
كان ناقص ياكل مال اليتيم في المسلسل الأيقوني “باب الحارة”، شوفنا كمية شر حتى في أتفه المواقف، بس ماتفهمش ليه برضه الناس حبت الشخصية وماقدرتش تكرهها، يمكن لإن وهو بيكرهك فيه بيضحكك أساسًا. الممثل السوري من أصل فلسطيني، نزار أبو حجر، عرف يجمع المعادلة الصعبة دي.