كتير بنتكلم عن التنمر اللي ممكن نكون اتعرضنا له من ناس حوالينا؛ صحاب أول أهل أو زمايل في الشغل، لكن مش ناس كتير بتتكلم عن تأثير التنمر أو الكلام السلبي اللي كتير مننا سمعه من المدرسين، خصوصًا واحنا صغيرين، والكلام أثر فينا قبل ما نعرف أو يكون عندنا الوعي الكافي إننا مش المفروض نتأثر بالكلام ده أو إنه يقلل من ثقتنا في نفسنا أو شخصيتنا.. حسينا إن دي حاجة مهم نتكلم فيها دلوقتي، يمكن علشان الجيل الأصغر يكون عنده الوعي اللي كان نفسنا حد يعمله لنا واحنا قدهم.
من فاشل مش هيلحق كلية.. لأهم واحد في كلية أحلامه
كريم بيحكي لنا عن موقف من مدرس وهو في ثانوي: “وأنا في ثانوية عامة تحديدًا، كان مدرس علم النفس والفلسفة أوقات كتير بيقول لي أنت لو ماركزتش في الحصة مش هتلحق حتى كلية، وسبحان الله كان عليه طريقة وهو بيقول الكلام ده تخليك فعلًا ثقتك في نفسك في الأرض، رغم إنه مفروض مدرس علم نفس يعني وفاهم قد إيه ده له تأثير سلبي”.
وكمل: “فاكر كلمته ليا: لو سرحت في الحصة مش هتلحق معهد صرف صحي، بس أنا دلوقتي قابلته بعد سنين، وكنت فخور وأنا بقوله إني دخلت الكلية اللي كنت بحلم بها ومشروع تخرجي كان أفضل مشروع في الكلية بتقدير ومركز من قياداتها، ودلوقتي بشتغل الشغل اللي بحبه وبحلم به من وأنا طفل، وبقيت مذيع في الراديو”.
أقنعك ازاي إني شاطرة؟
ريم حكت لنا: “مش عارفة ازاي أقنع مدرس الفرنساوي إني كويسة يعني وشاطرة وبفهم، لإن كان عنده تصميم رهيب إني فاشلة وحتى لما كنت بثبتله بدرجاتي في الامتحانات كان بيقول لي كنتي قاعدة جنب مين وغشيتي؟ لإن دي أكيد مش درجاتك، واكتشفت بعدين إنه فعلًا كان بيفضل يسأل الفصل شخص شخص علشان يعرف كان مين اللي قاعد جنبي في لجنة الامتحان ومين غششني، ومهما حلفوا له إني مش بغش منهم مش بيصدق، بس أنا دلوقتي بشتغل مترجمة فرنساوي، تفتكروا هيصدق دلوقتي؟”.
إلى مدرس الأحياء اللي قال لي ابقي قابليني لو نفعتي.. ها هنتقابل فين؟
هالة قالت: “مدرس الأحياء في ثانوي كان متجاهل لطموحي وشطارتي ومذاكرتي، وكان مع أبسط وأقل غلطة في الحل بيقول لي أنت فاشلة hبقي قابليني لو نفعتي، طب إيه اللي عايزة تدخليها ده أنت مش هيعدوكي من قدام القصر العيني حتى.. بس أنا دلوقتي بالبالطو، وحابة أوجه له رسالة: “ها هنتقابل فين؟”.
هتموتي قبل ما تكتبي جملة مفيدة
علياء قالت: “مدرس العربي في مرة رمى في وشي كشكول التعبير، وقال لي ساعتها “هتموتي قبل ما تكتبي جملة مفيدة” بدل ما يحاول يشتغل معايا على اللغة ويشجعني أكتب وأعبر عن نفسي، اختار الطريقة الأصعب، بس أنا دلوقتي نفسي أقابله وأقول له إني بقيت كاتبة ومقالاتي بتتنشر في واحدة من أهم وأكبر في المنصات في الشرق الأوسط”.
أنت فاشل
محمد بيحكي: “من وأنا صغير كان في مدرسة عندنا دايمًا على لسانها كلمة “أنت فاشل” حتى لو أنا غلطت غلطة صغيرة جدًا، لدرجة إن أنا نفسي ابتديت اقتنع فعلًا إني فاشل ومش نافع.. وزمايلي بقى عندهم فكرة متأصلة جواهم عني إني فعلًا فاشل، حتى لو منهم ناس ماتعاملتش معايا قبل كده أصلًا.. كبرت وسافرت وقررت أفتح مشروع في بلد أجنبية، بس دايمًا كان جوايا صوت بيقولي إني هفشل.. مع إن مشروعي نجح جدًا وفتحت مشروع كمان في مجال مختلف، ونجح برضه، لكن الغريب إن الصوت اللي جوايا اللي بيقول لي “أنت فاشل” مابيسيبنيش”.
يمكن الأجيال الجديدة لما يسمعوا قصص النهارده، وازاي الناس اللي سمعت كلام سلبي بقت شخصيات ناجحة دلوقتي وأثبتوا عكس اللي اتقال لهم وهما صغيرين، يمكن ثقتهم في نفسهم ماتتأثرش ويرموا الكلام ده ورا ضهرهم.