كواحدة من أكبر مُحبي البطاطس المحمرة، أو أي أكله مقلية في العموم، حسيت إنه ضروري إننا نتكلم عن الأكلات المقلية اللي بتبقي جزء لا يتجزأ من طاولة شعوب الشرق الأوسط، ونقدر جمال النوع ده من الأكل اللي كتير منه بيكون الملاذ الآمن لينا في خروجة حلوة مع صحابنا وعايزين نتجمع على أكلة حلوة، أو وإحنا راجعين من الشغل تعبانين وعايزين نتفرج علي كذا حلقة من المسلسل بتاعنا ورا بعض وعاوزين نتسلى بمقبلات مقلية. وعلشان إحنا مقدرين كل اللي الأكل المقلي بيجبهولنا من سعادة واحتواء في حياتنا، قررنا نعمل قائمة بالأكلات المقلية اللي لا غنى عنها على سفرة البيوت العربية.
الطعمية
مفيش شك إن الطعمية من واحدة من الأصناف الأساسية في أي فطار مصري أصيل، ومش مصر، معظم الدول العربية كمان بياكلوها وبيطلقوا عليها اسم “فلافل”، وممكن تتاكل بكذا طريقة، وبسلطات أو سادة. وأيًا كان شكلها سواء هتاكلها جوا عيش بلدي غرقان بالطحينة والسلطات، أو سادة بالشوكة، أنت أكيد هتستمتع بيها.
باذنجان مقلي
مينفعش نجيب سيرة الفطار المصري من غير ما نجيب سيرة البتنجان المقلي اللي أي أسرة مصرية أصيلة بتحبه وبتاكله بأشكال وطرق مختلفة. ففي اللي بيحب يحمره وياكله جوا العيش أو حتي بالشوكة، وفي أصحاب المزاج اللي بيعملوها في شكل مسقعة بالصلصة واللحمة، وفي كمان اللي بيعملوها من غير لحمة وبيسموها “المسقعة الكدابة”. وايًا كان شكل البذنجان إيه، وكدابة ولا حقيقية، هو حلو في كل أشكاله وأنواعه.
أصابع الجبن المقلية
على الرغم من إن الأكلة دي من أصل فرنسي، مش هتلاقي مطعم في مصر والوطن العربي مش بيقدمها عنده كمكون رئيسي في طبق المقبلات اللي بيقدموه. ويا سلام بقي لو هتغمسها في صوص سبايسي، هتبقى أحلي من الطبق الرئيسي نفسه.
كبة لبنانية مقلية
الكبة، أو زي ما المصريين بيقولوا عليها “كوبيية” من الأكلات المشهورة اللي كتير من الناس بتحبها وكمان كل بلد بتعملها بطريقتها الخاصة. فمثلًا الكبة اللبنانية من الأكلات المشهورة في لبنان وليها مذاق خاص، وده لأنهم بيحطوا فيها حاجات زي اللوز علشان تدي طعم مختلف.
المبطن الليبي
دي من الأكلات اللذيذة جدًا، وبتتكون من قطع بطاطس محشية باللحم وبتتقلي بقطع خبز مقرمش، وبيتضاف عليها للحمة المفرومة، والبصل الأخضر، والبقدونس، والكزبرة، والثوم، والزنجبيل، والتوابل الجافة، والفلفل الحار، ومعجون الطماطم علشان يدي نكهة أطعم للحمة.
كفتة الدجاج المقلية
علي الرغم من إنها مش من الاطباق المعروفة، بس لو جربت تعملها نقدر نقولك إنها هتبقي من وجباتك المفضلة، وهتضيف روح التجديد وكسر الروتين على الأكلات التقليدية. والطبق ببساطة بيتكون من دجاج مطحون بيُتبّل بالبهارات، وبيتشكل أقراص وبعدين بنقليه. اتحمست إنك تجربه؟
سمبوسك
بعيدًا عن النزاع ما بين هيا اسمها سمبوسة ولا سمبوسك، فالأكلة دي -أيًا كان أنت مسميها ايه- حلوتها في إن الحشو بتاعها ممكن تختاره على حسب مزاجك سواء جبنة (وتختار نوع الجبنة) أو لحمة مفرومة. وكمان ممكن تزود بسلة أو فلفل حار علشان تزود جمال علي جمال الطعم الأصلي. جعتوا؟
البانية وأجنحة الدجاج
مين فينا مكنش بينتظر الأكله دي بعد يوم دراسي طويل أو تمرين سباحة مرهق؟ معظمنا بيفضل وجبة البانيه أو قطع الدجاج خصوصًا لما تكون مصحوبة بصوصات كتيرة زي الكاتشب والميونيز والموستردة. والأكلة دي تقريبًا بيتفق عليها الشعوب كلها.
قطايف
بعد كل الحوادق اللي اتكلمنا عنها، جيه الوقت نحلي بقي، والتحلية في البيت، بالذات في رمضان، يعني القطايف. القطايف سهلة وسريعة التحضير وكمان ممكن تتعمل بكذا طريقة تناسب الأذواق كلها. في اللي بيحبها بالمكسرات، والقشطة أو الكريمة، والعسل، أو حتي سادة. أنت بتحبها إزاي؟