بواسطة منة حسني.
زي ما فرحة نتيجة الثانوية العامة مهمة في أغلب البيوت المصرية، عدم التوفيق في المرحلة دي مش معناه أبدًا إن الحياة هتقف عليها. ومع نزول النتيجة إمبارح، في مشاهير كتير كتير جدًا اتكلموا عن الفترة دي من حياتهم بعبارات مؤثرة، وقصص طريفة بتبين إن لسه في كتير أوي في الحياة، وإن المجموع الكبير مش كل شئ.
من ضمن المشاهير دول الفنان أحمد حلمي اللي حكى أكتر من مرة عن مجموعه القليل في الثانوية العامة، وسقوطه فيها لأكتر من مرة، وعن مشاكله الدراسية اللي ممنعتهوش من تحقيق حلمه.
فبالرغم من إن مجموعه كان 50% بعد إعادة للسنة دي لـ 3 مرات، وبالرغم من محدودية الخيارات الجامعية قدامه بالمجموع ده، قدر إنه ينضم للمجال اللي بيحبه لحد ما بقى دلوقتي واحد من أهم وأنجح الممثلين الكوميديين المصريين.
وبمجموع 57% في الثانوية العامة، قدر محمد هنيدي إنه يدخل كلية الحقوق، وللأسف أتفصل منها بعد سنتين بسبب غيابه الدائم عن المحاضرات، وأهتمامه بمسرح الكلية. وحكى هنيدي في أكتر من برنامج، وبوست على السوشيال ميديا إن مجموعه مكانش عائق أبدًا قدام حلمه في التمثيل.
وفي كمان أمير كراره اللي اتكلم في برنامج ” تعا اشب شاي ” مع الفنانة غادة عادل عن ذكرياته في الثانوية العامة، وقال بشكل ساخر عن أداءه في المرحلة دي إنه كان من أشطر تلاميذ المدرسة، وإنه طلع التاني في الثانوية العامة بمجموع 50%.
أما بقى تامر حسني فمجموعه كان 73% في الثانوية العامة، وده خلاه يدخل كلية الإعلام جامعة 6 أكتوبر، وعلى الرغم من اختلاف مجال دراسته عن حلمه الفني، مستسلمش للظروف، وتعب كتير جدُا علشان يحقق هدفه.
ومن مشاهير الفن للكورة، فمثلاً اللاعب المشهور رمضان صبحي كان جايب مجموع 60% في الثانوية العامة، و ده موقفش عائق قدام مشواره الرياضي ونجاحه في المجال اللي بيحبه.
دي مجرد نماذج لمشاهير، وناس ناجحة كتيرة مكنوش متفوقين في دراستهم المدرسية أو الجامعية في كل حتة في الدنيا، والفرق بينهم وبين أي حد تاني هو إنهم صدقوا حلمهم، وجريوا وراه بالرغم من كل الظروف.
