من وقت ما بدأت الدراسة وسنة رابعة ابتدائي عاملة شوية قلق، من إشاعات لوجود غلطة في قصيدة لأحمد شوقي، لوجود درس عن التحرش في مادة اللغة العربية “وده طبعًا شيء إيجابي وأول مرة يحصل”، لحد ما في الفترة الأخيرة سمعنا عن مشاكل وشكاوي كتير من الأهالي والأطفال تخص صعوبة المناهج، لدرجة إنهم بدأوا يعملوا حملات استغاثة على السوشيال ميديا والمطالبة بإقالة الوزير، ويصوروا فيدويوهات للأطفال وهما بيتكلموا عن معاناتهم في مذاكرة المنهج الجديد. طب الموضوع بدأ ازاي؟
سنة رابعة هي أول سنة يتطبق عليها النظام الجديد، ويعني إيه نظام جديد؟ يعني طريقة تقييم للطلبة مختلفة ومواد أكتر ومحتوى مختلف تمامًا عن اللي اتقدم للدفعات اللي قبلهم. غير كل ده، فالأهالي كانوا بيشتكوا إن اللي زود الموضوع أكتر هو تأخير صدور الكتب اللي المفروض يذاكروا منها، وهما في الأساس مطالبين بكم معين من المنهج لازم يخلص في وقت معين علشان يتقيموا عليه، ده بالإضافة لصعوبة المنهج اللي اتكلموا عليها، وكانت على حد تعبير الأهالي “فوق طاقتهم الإستيعابية”. وأضافت أم لطالبة: “في حاجات بتدرسها بنتي أنا مادرستهاش غير وأنا في ثانوي!” “فهل من المعقول إن بنت عمرها 9 سنين تاخد الجهاز الهضمي للإنسان ولـ9 حيوانات!”
منهج رابعه ابتدائي ادبي ولا علمي
Posted by نجم بير السلم – Sam Sawirs on Wednesday, November 10, 2021
طب كان رد البرلمان إيه على شكوى الأهالي؟
البداية كانت من عند النائبة أمل سلامة (عضو مجلس حقوق الإنسان بمجلس النواب)، وقت لما طالبت باستدعاء عاجل لوزير التربية والتعليم، علشان تناقشه في كل الشكاوي المقدمة من الأهالي، وكانت الأسئلة واضحة “هل تطوير التعليم من وجهة نظر الوزير هو وضع المناهج الصعبة؟” أم وضع مناهج تتناسب تتدريجيًا مع سن الطلاب وقدراتهم وتفكيرهم؟” وأضافت “إن محتوى مادة العلوم بيشبه محتوى مادة الأحياء لسنة تانية ثانوي!” وإن في مواد أصلًا جديدة اتضافت للطلبة من غير ما يكون لها مدرسين يدرسوها!
وتابعت “إن قرار تطبيق النظام الجديد على سنة رابعة ابتدائي، قرار مش مدروس من الناحية النفسية للطلبة، وكان لازم يتم تأهيل الطلبة والمعلمين قبل أي خطوة.”
طب الوزير كان رده إيه؟
قال وزير التربية والتعليم طارق شوقي: “إن مناهج التعليم الجديدة وبالأخص مناهج سنة رابعة هي أفضل ما أنجرته الوزارة بكل المقاييس العلمية والعالمية، وإن الانتقادات دي هي جزء من عملية ممنهجة لإفساد تطوير التعليم المصري”.
أما عن ردود أفعال الناس على السوشيال ميديا كانت واخدة جانبين، ناس بتأيد فعلًا كلام الأهالي في صعوبة المناهج، حتى المدرسين بيأيدوا الرأي، وناس تانية شايفة إن في شوية أفورة في الموضوع، وإن احنا مرينا بمناهج صعبة كتير قبل كده، واشمعنا المرة دي الموضوع أخد الضجة الكبيرة دي؟