منع فيلم ديزني Eternals من بعض الدول العربية، وأول بطل خارق مثلي في عالم مارفل
فيلم ديزني الجديد Eternals هو الفيلم الـ 26 في عالم مارفل، الفيلم بطولة مجموعة كبيرة من نجوم هوليود؛ منهم سلمى حايك وأنجيلينا جولي وكيت هارينغنتون (اللي عمل دور جون سنو في مسلسل جايم أوف ثرونز)، والممثل اللبناني المسلم هاز سليمان.
![](https://ar.scoopempire.com/wp-content/uploads/sites/4/2021/11/Brian-Tyree-Henry-as-Phastos-in-Eternals.jpg)
فيلم Eternals بيقدم حاجات كتير جديدة لعالم مارفل، منها المحتوى الجنسي، وأول بطل خارق مثلي الجنس. البطل المثلي هو Phastos وهو أول بطل خارق مثلي الجنس يتقدم في عالم أفلام مارفل، واللي عامل دوره الممثل بريان تايري هينري، واللي بنشوفه في الفيلم متجوز وعايش مع شريكه وعندهم ابن، يعني أسرة كويرية Queer family.
الممثل اللبناني المسلم هاز سليمان بيقوم بدور زوج Phastos، وفي مشهد تجنيد البطل مع فرقة الخارقين لمواجهة الأشرار وإنقاذ العالم، بيتهي المشهد بقبلة بين البطل المثلي وزوجه، والمشهد ده يعتبر أول مشهد فيه محتوى مثلي الجنس في عالم أفلام مارفل لحد دلوقتي.
الجدير بالذكر إن الشخصيات الكويرية LGBTQ+ في عالم الكوميكس بتاع مرافل و DC كتير جدًا، وفي شخصيات أبطال خارقين مثليين وثنائي التوجه الجنسي وعابرين وعابرات للجنس. الشخصيات الكويرية اللي في الكوميكس كانت غالبًا بتتصغر في الأفلام أو بيتغير توجهها الجنسي للغيرية الجنسية في السينما، وبكده بيكون فيلم Eternals أول فيلم يطلع شخصية بطل خارق مثلي بكامل شخصيته وتجوهه الجنسي.
![](https://ar.scoopempire.com/wp-content/uploads/sites/4/2021/11/eternos-1024x624.jpg)
منع فيلم Eternals من بعض الدول العربية بسبب البطل الخارق المثلي
بسبب وجود بطل خارق مثلي في الفيلم تم منعه من العرض في السعودية ودول عربية تانية. والجدير بالذكر إن قرار المنع جه في اللحظة الأخيرة، لإن الترويج للفيلم وإعلاناته في سينمات الدول دي كان شغال لحد من كم يوم بس. ورغم إن قرارات المنع من العرض ماتأكدتش في كل الدول العربية لكنها اتأكدت في السعودية وقطر والكويت والبحرين وعمان بسبب الرقابة، والجدير بالذكر كمان إن لسه لحد دلوقتي تذاكر الفيلم بتتباع في الإمارات.
بتفرض دول مختلفة الرقابة على الأفلام اللي مش بتتوافق مع الإرشادات المحلية وبتعملها تعديل في بعض الأحيان. وفي حالة دول عربية كتير بتتحذف مشاهد الجنس والمثلية الجنسية والقضايا الدينية من الأفلام علشان تتماشى مع قوانين رقابة الدول دي.
اتكلم عمرو أديب في برنامج (الحكاية مع عمرو أديب) عن فيلم Eternals واعترض على محتوى المثلية الجنسية اللي الفيلم بيعرضه، وقال إن دي حاجة مش مقبولة في المجتمع الشرقي المسلم، وإن ضغط المجتمع الغربي علينا كمجتمع شرقي علشان يحقن أفكار مخالفة لثقافتنا مش مقبول، وعبر أديب عن غضب شديد من تقديم ديزني للمثليين كأشخاص طبيعين وقال: “بقوا يطلعوهم ناس كويسة ولذوذة ونموذج”، وقال: “رضينا بالهم والهم مش راضي بينا”.
رد أبطال فيلم Eternals على منع عرض الفيلم في بعض الدول العربية
قال الممثل اللبناني هاز سليمان: “القبلة اللي في الفيلم بيني وبين بريان تايري هينري شيء جميل، وبتحرك المشاعر، كل الناس عيطت في لوكيشن التصوير واحنا بنصور المشهد ده. ومن المهم نصور قد إيه الأسرة الكويرية (الأسرة المكونة من أبوين أو أمين من نفس الجنس وأبناء) مليانة حب وجمال”.
وكان في حالة شد وجذب ما بين ديزني ومارفل من ناحية والدول العربية اللي منعت عرض الفيلم من ناحية. الدول دي طلبت قطع المشاهد اللي فيها محتوى المثلية الجنسية، وديزني رفضت تعمل كده لإن المخرجة قالت إن المشاهد دي مهمة جدًا للسياق الدرامي بتاع الفيلم، وبعد رفض ديزني قطع المشاهد، قررت الدول دي تمنع عرض الفيلم في سينماتها خالص.
أنجيلينا جولي، اللي عاملة شخصية البطلة الخارقة ثينا في الفيلم قالت: ” أنا فخورة بمارفل علشان رفضت تقطع المشاهد المثلية من الفيلم”. وكملت: “أنا مش فاهمة ازاي احنا في 2021 ولسه الناس مش شايفه قد إيه العيلة الكويرية اللي بتمثلها عيلة Phastos في الفيلم، مليانة حب وقد إيه العلاقة دي جميلة”. وقالت كمان: “ازاي أي حد ممكن يكون متعصب من حاجة زيّ كده؟، أي حد ممكن يرفض أو مايقدرش الحب في كل أشكاله هو شخص جاهل”.
وعبر هاز سليمان عن سعادته بقرار مارفل، ووصف قرار الدول العربية اللي رفضت عرض الفيلم بالمثير للشفقة، وإن العالم بيتغير حولينا والناس اللي هتفضل عايشة في أفكار الكراهية والرفض هتفضل متأخرة ومتخلفة.