منة شلبي اترشحت لـ Emmy Awards عن دورها فى مسلسل “فى كل أسبوع يوم جمعة”

نشر المخرج عمرو سلامة من خلال صفحته على الفيسبوك خبر ترشح الفنانة المصرية منة شلبي لجايزة الإيمي، وقال في البوست اللي بيهنيها فيه: “الفنانة الرائعة منة شلبي تحصد ترشيح لجائزة الإيميز العالمية Emmy’s International، أهم جوائز في العالم للأعمال التليفزيونية عن دورها في مسلسل في كل أسبوع يوم جمعة.”

وتابع: “المسلسل عن رواية الكاتب الكبير إبراهيم عبد المجيد، معالجة درامية: إياد إبراهيم، سيناريو وحوار: إياد إبراهيم، سمر عبد الناصر، محمد هشام عبيه  إخراج محمد شاكر”.

وجايزة الإيمي هي واحدة من أهم الجوايز العالمية اللي بتاخدها الأعمال التلفزيونية والدرامية المميزة، وبتحتفل بتكريم فنانين الدراما (التليفزيون) المميزين في كل مكان في العالم. ودي النسخة الـ 49 من الجايزة، وحفلة توزيع الجوايز هتكون في 22 نوفمبر اللي جاي في مدينة نيويورك الأمريكية.

اترشحت منة شلبي عن فئة أفضل ممثلة تلفزيونية عن دورها في مسلسل “في كل أسبوع يوم جمعة” للمخرج محمد شاكر خضير، وبتتنافس في الفئة دي مع: فاليريا بيتوتشيلي عن مسلسل “El Cuaderno de Tomy” من إنتاج نتفليكس، وآن جرابين عن مسلسل “Patria” من إنتاج HBO الأوروبية، وهايلي سكوايرز عن مسلسل “Adult Material”.

أحداث مسلسل “في كل أسبوع يوم جمعة” بتتكلم عن ليلى اللي عندها ماضي مجهول وبتضطر تعيش مع عماد، اللي عنده مرض عقلي، في بيته كزوجة له بموجب صفقة، تبدأ تحصل سلسلة من الجرايم البشعة كل يوم جمعة في مكان.

مبروك للفنانة الجميلة منة شلبي على ترشيحها للجايزة، ونتمنى إنها تفوز بيها.

آخر كلمة: ماتفوتوش قراءة: نقل ريهام سعيد للمستشفى بعد الإصابة بفيروس كورونا ومعاناتها من تبعيات المرض

تعليقات
Loading...