من أول امبارح وفي سفينة تجارية عملاقة “ايفرجرين” اتزنقت وهي بتعدي من قناة السويس، واحدة من أهم معابر التجارة في العالم.. اتزنقت إزاي؟ في كلام كتير في الأول اتقال إنها اتعملت عن قصد لتعطيل الحركة، وده فعلًا اللي حصل، في سفن كتيرة جدًا فضلت واقفة زيّ ما بنفضل واقفين في الاشارات بالعربيات، ولكن الحادثة دي ماحصلتش عن قصد.. فهي بكل بساطة بسبب سوء الأحوال الجوية والعاصفة الترابية اللي كانت في مصر على مدار اليومين اللي فاتوا، الرؤية ماكنتش واضحة وده اللي أدى لجنوح السفينة بعرض القناة.
السفينة ايفر جرين بترجع لشركة يابانية شوي كيسن، واللي اعتذرت عن اللي حصل، وإنها بتحاول تحل الموقف، وإن مفيش إصابات أو تسرب نفطي نتج عن جنوح السفينة.. وكمان شركة تأمين السفينة هتدفع تعويضات بالمليارات للضرر اللي سببته في القناة، وللعطل اللي سببته لكل السفن التانية، والمسئولين حاليًا بيحاولوا يحلوا الأزمة، فشوفنا ونش بيحاول يحفر مكان ما السفينة لازقة في جانب القناة، وكمان الشركة اليابانية بعتت مساعدات علشان يسرعوا في حل الأزمة.
وأعلن الفريق أسامة ربيع رئيس هيئة قناة السويس إن حركة الملاحة بالقناة هتتعلق بشكل مؤقت النهارده الخميس لحد ما يتم الانتهاء من أعمال تعويم سفينة الحاويات البنمية العملاقة بالقناة، وقال إن جهود تعويم السفينة شملت القيام بأعمال الشد والدفع بواسطة 8 قاطرات عملاقة في مقدمتهم القاطرة بركة ١ بقوة شد ١6٠ طن.