بعد إشاعات قيادتها لسفينة قناة السويس.. مين هي مروة السلحدار أول قبطانة مصرية

في أزمة بسبب تغير المناخ، سفينة “ايفر جرين” اللي جنحت في قناة السويس وأدت لتوقف حركة الملاحة، شوفنا انتشار لأخبار إن السفينة دي بقيادة القبطانة المصرية مروة السلحدار، وانتشرت معاها تريقة سخيفة من نوع “سواقة البنات” اللي بنشوفها، لكن كل الأخبار دي طلعت إشاعات، وصور الخبر متفبركة من الخبر الأصلي احتفالًا بكونها أول قبطانة مصرية في يوم المرأة، وطلعت القبطانة كذبت ده من خلال مداخلة في برنامج “تحت الشمس” مع معتز عبدالفتاح، ووضحت إنها حاليًا على متن السفينة “عايدة 4” التابعة لهيئة السلامة البحرية بمحافظة الإسكندرية وإنها بتمارس شغلها بشكل طبيعي، مروة السلحدار هي أول قبطانة مصرية وعربية، تعالوا نعرف مين هي.

مروة اتخرجت من الأكاديمية العربية للعلوم والتكنولوجيا والنقل البحري في الدفعة رقم 73، واحتفلت الأكاديمية بتخريج أول قبطانة مصرية، واعتبرت الأكاديمية تخرجها بداية لدخول المرأة مجال العمل البحري، واتكرمت مروة من الرئيس عبدالفتاح السيسي في احتفالية يوم المرأة المصرية في 2017، والتحقت للعمل بسفينة “عايدة 4” برتبة ظابط ثان، وبكده تبقى مروة أول بنت مصرية يتحط اسمها ضمن طقم كبير للسفينة، ورفضت تشتغل في الشركات الخاصة وفضّلت تكون واحدة من أفراد الأسطول المصري. سفينة “عايدة 4” بتمتلكها الدولة وهي مخصصة لتموين الفنارات المنعزلة، وبيتم تشغيلها من الهيئة المصرية لسلامة الملاحة البحرية، ببروتوكول بينها وبين الأكاديمية العربية للعلوم والتكنولوجيا والنقل البحري لتدريب طلاب الأكاديمية أثناء إبحار السفينة.

في خلال نجاحها في مسيرتها اللي بتكون فيها أول بنت، وبتثبت إن مفيش شغل حكر على جنس واحد، وبتحقق نجاحات محدش سبقها فيها، أكيد هتلاقي أعداء لده، لكن أسلوب السخرية والتقليل ده مش مسموح في وسط ما الكل بيتابع أخبار تعطل السفينة اللي أدى لتعطيل الحركة الملاحية وبتأثر على العالم كله، والناس بتتابع إزاي هيتم حل المشكلة، فيه ناس قاعدة بس علشان تقلل من إنجازات وتفبرك أخبار علشان تقلل من اللي بنوصله، بس لازم ندور في كل حاجة بنشوفها ونعرف الحقيقة فين.

آخر كلمة: ماتفوتوش قراءة: أبطال مجهولة: سيدات عرب ضمن قائمة BBC لأكثر النساء تأثيرًا في العالم 2020

تعليقات
Loading...